برطانوی شہزادہ ولیم اور اہلیہ کی صدر اور وزیر اعظم پاکستان سے ملاقات

برطانوی شہزادہ ولیم اور اہلیہ شہزادی کیٹ مڈلٹن نے آ ج صدرِ پاکستان ڈاکٹر عارف علوی اور وزیر اعظم عمران خان سے وفاقی دارالحکومت اسلام آباد میں ملاقات کی۔

ایوانِ صدر پہنچنے پر خاتونِ اوّل اور صدر عارف علوی نے شاہی جوڑے کا  استقبال کیا اور انہیں خوش آمدید کہتے ہوئے ایوانِ صدر کے اندر آنے کی دعوت دی۔

یہ بھی پڑھیں: ایرانی عوام کی ٹانگیں سلامت، امریکا کے گھٹنے ٹوٹ چکے ہیں۔حسن روحانی

برطانوی شاہی جوڑے نے صدر سے ملاقات کے دوران موجودہ حکومت کی کارکردگی کو سراہتے ہوئے موسمیاتی تبدیلی، غربت کے خاتمے اور دیگر امور کی تعریف کی۔

شہزادہ ولیم اور شہزادی کیٹ سے  ملاقات کے دوران  صدرِ مملکت ڈاکٹر عارف علوی اور خاتونِ اوّل ثمینہ علوی نے پاک برطانیہ تعلقات کے ساتھ ساتھ باہمی دلچسپی کے موضوعات پر بھی تبادلۂ خیال کیا۔

بعدازاں شاہی جوڑے کو وزیر اعظم ہاؤس لے جایا گیا۔ وزیر اعظم پاکستان عمران خان نے بھی ان کا استقبال کیا اور پاکستان آمد پر برطانوی مہمانوں کا شکریہ ادا کیا۔

وزیر اعظم عمران خان سے ملاقات کے دوران شہزادہ ولیم اور اہلیہ شہزادی کیٹ کے درمیان پاکستان اور برطانیہ کے مابین تعلقات اور باہمی دلچسپی کے امور گفتگو کا حصہ رہے۔اس دوران شہزادی کیٹ نے سبز اور سفید رنگ کا لباس زیب تن کر رکھا تھا۔ 

یاد رہے کہ برطانوی شاہی جوڑا اس وقت پاکستان کے دورے پر اسلام آباد میں موجود ہے جہاں  اس سے قبل  انہوں نے بچیوں کے اسکول ماڈل کالج فار گرلز  کا دورہ کیا۔

وفاقی دارالحکومت کے ماڈل کالج فار گرلز پہنچنے پر کالج انتظامیہ نے گرمجوشی سے شہزادہ ولیم اور ان کی اہلیہ کا استقبال کیا جبکہ دونوں مہمانوں نے مسکرا کر اپنے میزبانوں کے ستائشی کلمات کا جواب دیا۔

مزید پڑھیں: برطانوی شہزادہ ولیم اور اہلیہ کا اسلام آباد ماڈل کالج فار گرلز کا دورہ