شرابی دلہا نے دلہن کی سہیلی کو ورمالا پہنا کر دلہن سے تھپڑ کھا لیا

بھارتی ریاست اترپردیش کے ضلع بریلی میں ایک شادی اس وقت ڈرامائی موڑ اختیار کرگئی جب دلہا نے منڈپ میں دلہن کے بجائے اس کی سہیلی کو ورمالا پہنادی۔

بھارتی میڈیا کے مطابق بریلی کے گاؤں میں ہونے والی شادی میں 26 سالہ دلہا رویندر کمار شراب کے نشے میں دھت پنڈال پہنچا تھا اور بظاہر اس نے غلطی سے دلہن کی سہلی کو شادی کی ورمالا پہنادی۔

ہوا کیا؟

دلہے کے نشے میں ہونے اور اپنی سہیلی کو ورمالا پہنانے پر 21 سالہ دلہن رادھا دیوی نے غصے سے دلہا کو تھپڑ مارا اور شادی منسوخ کردی۔

اس وقعے کے بعد شادی کی تقریب اکھاڑا بن گئی اور دلہن کے رشتے داروں اور باراتیوں نے ایک دوسرے پر کرسیوں سے حملہ کردیا لیکن ہفتے کے روز پیش آنے والے اس واقعے میں یہ واحد ڈراما نہیں تھا۔

معاملہ اس وقت شروع ہوا جب 26 سالہ دلہا رویندر کمار اپنی بارات کے ساتھ پنڈال دیر سے پہنچا۔ دلہن کے خاندان کی جانب سے درج ہونے والے ایف آئی آر کے مطابق دلہے کے گھر والوں نے اضافی جہیز کا مطالبہ بھی کیا تھا۔

دلہن کے والد کا کہنا ہے کہ انہوں نے شادی سے پہلے کی رسومات میں ڈھائی لاکھ روپے اور شادی کے دن 2 لاکھ روپے دے دیے تھے لیکن یہ رقم دلہے کے گھر والوں کے لیے کافی نہیں تھی۔

واقعے کے بعد ایک کہانی یہ بھی سامنے آئی ہے کہ رویندر کمار اپنی پسند کی لڑکی سے شادی کرنا چاہتا تھا۔ اس لیے مبینہ طور پر وہ اپنی شادی کےلیے شراب کے نشے کی حالت میں بارات لے کر پہنچا تھا اور دلہن کے خاندان اور رشتے داروں کے ساتھ بدتمیزی کی۔

ایف آئی آر کے مطابق شادی کی رسم میں ہاروں (ورمالا) کے تبادلے کی رسم تک وہ اپنے دوستوں کے ساتھ کافی دیر تک شراب نوشی کرتا رہا اور رسم میں اپنی دلہن کو ہار پہنانے کے بجائے، اُس نے غلطی سے دلہن کے برابر میں کھڑی اس کی سہیلی کو ہار پہنا دیا۔ غصے میں بھری رادھا دیوی نے فوراً دلہے کو تھپڑ مارا اور وہاں سے چلی گئی۔

اس کے بعد دونوں خاندانوں کے درمیان جھگڑا شروع ہوگیا اور دونوں طرف سے کرسیاں اُڑنے لگیں۔ آخرکار پولیس وہاں پہنچی اور صورتحال پر قابو پا لیا۔

پولیس نے دلہا اور اس کے دوستوں کو حراست میں لے لیا اور دلہن کے خاندان کی توہین اور ’’امن میں خلل ڈالنے‘‘ کے الزام میں مقدمہ درج کرلیا۔ دولہے کے خلاف جہیز کے مطالبے کا بھی مقدمہ درج کیا گیا ہے۔

اطلاعات کے مطابق دلہے کے دوستوں نے مبینہ طور پر غیرقانونی شراب خرید کر اسے پلائی تھی۔ شراب فروخت کرنے والے ایک شخص کو بھی گرفتار کرلیا گیا ہے۔