جنوبی وزیرستان، دکان میں دھماکے کے باعث 1 بچہ جاں بحق

پشاور: جنوبی وزیرستان کے علاقے میں واقع دکان میں دھماکے کے باعث 1 بچہ جاں بحق ہوگیا ہے۔ دھماکہ کباڑ کی دکان میں ہوا۔

تفصیلات کے مطابق کباڑ کی دکان میں دھماکے کا واقعہ جنوبی وزیرستان کے علاقے وانا میں پیش آیا۔ دھماکے کے نتیجے میں ایک بچہ جاں بحق جبکہ 3 زخمی ہو گئے ہیں۔

یہ بھی پڑھیں:

سوشل میڈیا پر لڑکی کو ہراساں کرنے والا 55 سالہ شخص گرفتار

شمالی وزیرستان میں دہشتگردوں کے خلاف آپریشن، فوجی جوان شہید

قانون نافذ کرنے والے اداروں نے واقعے کی تفتیش شروع کردی ہے۔ ابتدائی تحقیقات کے مطابق دھماکہ حادثاتی طور پر ہوا جو کسی دہشت گردی کی کارروائی کا نتیجہ نہیں۔ 

وزیرستان پولیس کا کہنا ہے کہ وانا میں دکان کے اندر کباڑی ناکارہ مارٹر گولے کو توڑ رہا تھا کہ دھماکہ ہوگیا جس کے نتیجے میں 4 بچے زخمی ہوگئے تھے۔

پولیس کا کہنا ہے کہ زخمی ہونے والے چاروں بچوں کو طبی امداد کیلئے ہیڈ کوارٹرز ہسپتال منتقل کیا گیا جہاں ایک بچہ عبدالمالک زخموں کی تاب نہ لاتے ہوئے جان کی بازی ہارگیا۔

یاد رہے کہ اس سے قبل شمالی وزیرستان میں ملک دشمنوں کے خلاف آپریشن کے دوران فورسز اور دہشت گردوں کے درمیان فائرنگ کے تبادلے میں ایک سکیورٹی اہلکار شہید ہو گئے۔

آئی ایس پی آر کا 5 روز قبل کہنا تھا کہ شمالی وزیرستان کے ضلع میران شاہ میں دہشت گردوں اور فورسز کے درمیان فائرنگ کا شدید تبادلہ ہوا۔ اس دوران  نائیک زاہد احمد نے دہشت گردوں کا بہادری سے مقابلہ کرتے ہوئے وطن پر جان نچھاور کردی۔