سکیورٹی خدشات، بلاول کا زمینی سفر کم، فضائی سفر کو ترجیح دینے کا فیصلہ

اسلام آباد: چیئرمین پیپلز پارٹی کو سکیورٹی خدشات لاحق ہیں جس کے تحت بلاول بھٹو زرداری نے زمینی سفر کم کرتے ہوئے فضائی سفر کو ترجیح دینے کا فیصلہ کیا ہے۔

تفصیلات کے مطابق چیئرمین پی پی پی کی سکیورٹی کو مزید سخت کردیا گیا۔ آئندہ بلاول بھٹو زرداری سڑک کے ذریعے کم سے کم سفر کریں گے۔ ہیلی کاپٹر اور جہاز کے ذریعے سفر کو ترجیح دی جائے گی۔

یہ بھی پڑھیں:

ٹرانسپرنسی کی رپورٹ نے عمران خان کی کرپشن کا بھانڈا پھوڑ دیا، بلاول بھٹو

قبل ازیں بلاول بھٹو زرداری نے لاہور سے سیال شریف کا سفر ہیلی کاپٹر کے ذریعے کیا۔ اور رات ہونے سے پہلے ہیلی کاپٹر کے ذریعے ہی بلاول ہاؤس لوٹ آئے۔ چیئرمین پی پی پی کی سکیورٹی سخت کردی گئی ہے۔

خیال رہے کہ اس سے قبل  بلاول بھٹو زرداری کا کہنا تھا کہ ٹرانسپرنسی کی رپورٹ نے عمران خان کی کرپشن کا بھانڈا پھوڑا دیا، ہم نے پہلے ہی کہا تھا یہ سلیکٹڈ ہے، نااہل وزیراعظم کا مقابلہ کرنے کے لئے اعلان جنگ کرکے 27 فروری کو نکلیں گے۔

چیئرمین پیپلزپارٹی بلاول بھٹو زرداری کا گزشتہ روز سرگودھا میں جلسے سے خطاب کرتے ہوئے کہنا تھا کہ جب سے یہ حکومت آئی ہے تبدیلی کے نام پر تباہی چل رہی ہے، عوام کے انسانی اور معاشی حقوق پر حملے ہو رہے ہیں۔