ڈرامہ سیریل دوبارہ کا دلچسپ اختتام، سوشل میڈیا صارفین کی تعریف

اپنی ابتدائی اقساط سے ہی ڈرامہ سیریل ’دوبارہ‘ پاکستانی ناظرین کی پسندیدہ سیریز رہی ہے، اور کیوں نہ ہو؟ ڈرامہ اپنی پہلی قسط سے عام خلفشار سے دور ہے، یہاں تک کہ ڈرامے کی ایک قسط بھی غیر ضروری نہیں تھی۔

حال ہی میں شوبز انڈسٹری کے دلکش اداکار بلال عباس اور معروف گلوکارہ حدیقہ کیانی کے ڈرامے دوبارہ کا اختتام ہوا، جس کی سوشل میڈیا صارفین کی بڑی تعداد تعریف کررہی ہے۔

ڈرامے کی کہانی مہرو نامی خاتون کی زندگی کے گرد گھومتی ہے جس کا کردار حدیقہ کیانی نے ادا کیا ہے جو کہ ایک امیر گھرانے سے تعلق رکھتی ہے اور اسے ایک نوجوان لڑکے ماہر سے پیار ہو جاتا ہے جس کا کردار بلال عباس نے ادا کیا ہے۔ مہرو کی ایک بیٹی اور ایک بیٹا ہے۔

یہ بھی پڑھیں:

سوشل میڈیا صارفین فلم ’براہمسٹرا‘ کی پابندی کا مطالبہ کیوں کررہے ہیں؟

ڈرامے کی کہانی نہ صرف منفرد اور متنوع ہے بلکہ یہ فرق کی قبولیت، الجھے ہوئے رشتوں، ثقافتی توقعات، اور سماجی نام نہاد معیارات اور اصولوں کے گرد بھی گھومتی ہے۔

دانش نواز کی ہدایت کاری میں بننے والے اس ڈرامے کی گزشتہ رات آخری قسط نشر ہوئی، جس کو دیکھ کر سوشل میڈیا صارفین نے اس بات پر اطمینان کا اظہار کیا کہ ڈرامہ بنانے والے ہر رشتے کے تاریک پہلو کو کتنی خوبصورتی سے دکھا رہے ہیں۔

سوشل میڈیا صارفین کی اکثریت ڈرامے کے اختتام سے خوش نظر آئی اکثریت کا یہی خیال تھا کہ ہر عورت کو حقیقی زندگی میں مہرو کے جیسا ہی ہونا چاہیے۔

ایک صارف نے تبصرہ کیا کہ ڈرامے کا اختتام بہت زیادہ اچھا تھا، اس میں بیوہ کو جس طرح سے دکھایا گیا وہ معاشرے کی سوچ کو کافی حد تک تبدیل کرسکتا ہے۔