گوگل نیوز پر ہمیں فالو کریںاسلام آباد: حکومتی اسکیم کے تحت 1 لاکھ 7 ہزار 526 عازمینِ حج میں سے سعودی عرب جانے والے خوش نصیبوں کے انتخاب کے لیے قرعہ اندازی آج ہوگی۔
سماجی رابطے کی ویب سائٹ ٹوئٹر پر اپنے پیغام میں وزارتِ اطلاعات نے بتایا کہ حکومتی اسکیم کے لیے قرعہ اندازی آج اسلام آباد میں ہوگی۔
حج کی قرعہ اندازی کے حوالے سے وزارتِ اطلاعات نے تصدیق کی کہ حج کی قرعہ اندازی وفاقی وزیر برائے مذہبی امور و بین المذاہب ہم آہنگی صاحبزادہ نور الحق قادری انجام دیں گے۔
قرعہ اندازی کے بعد حکومتی اسکیم کے تحت رواں سال حج کے لیے جانے والے خوش نصیب عازمینِ حج کے ناموں کا اعلان کیا جائے گا۔
The balloting to choose over 107,526 intending pilgrims for #Hajj under the government scheme will be held in Islamabad today. Minister for Religious Affairs and Interfaith Harmony Sahibzada Noor-ul-Haq Qadri will perform the balloting. pic.twitter.com/quhz3eUOAl
— Ministry of Information & Broadcasting (@MoIB_Official) March 12, 2020
اس سے قبل وزارتِ مذہبی امور نے حج درخواستیں وصول کرنے کی تاریخ میں 2 روز کی توسیع کی تھی جس کے لیے اسٹیٹ بینک کو خط لکھا گیا۔
وفاقی وزارتِ مذہبی امور نے گزشتہ ہفتے حج درخواستیں کی وصولی میں 2 دن کی توسیع کے لیے خط لکھا جبکہ ترجمان مذہبی امور نے کہا کہ حج درخواستوں کی وصولی 8 مارچ تک جاری رہے گی۔
ترجمان مذہبی امور کے مطابق اسٹیٹ بینک کو آگاہ کردیا گیا کہ نامزد بینک ہفتے اور اتوار کے روز بھی حج درخواستیں وصول کریں گے جبکہ سرکاری حج اسکیم کی قرعہ اندازی 12 مارچ کو ہوگی۔
یاد رہے کہ اس سے قبل وفاقی وزیر نور الحق قادری نے حج پالیسی کا اعلان کرتے ہوئے کہا کہ رواں سال ایک لاکھ 79 ہزار 210 پاکستانی حج ادا کرسکیں گےاور سرکاری حج کا خرچہ 4 لاکھ 90 ہزار ہوگا۔
اسلام آباد میں گزشتہ ماہ پریس کانفرنس کرتے ہوئے نور الحق قادری نے کہا کہ سعودی عرب کی جانب سے پاکستان کو دیا گیا کوٹہ ایک لاکھ 79 ہزار 210 ہے۔
مزید پڑھیں: حج اخراجات 4 لاکھ 90 ہزار تک ہوں گے۔نورالحق قادری
