عالمی درجہ بندی میں بابر اعظم اول نمبر پر، پاکستان دوسری بہترین ٹیم بن گئی

آئی سی سی مینز ٹی 20 بیٹنگ رینکنگ میں قومی کرکٹ ٹیم کے کپتان بابر اعظم  پہلے نمبر پر پہنچ گئے ہیں۔ بابر اعظم نے 834 پوائنٹس حاصل کرکے ٹی 20 کی عالمی رینکنگ میں پہلے بیٹر کا درجہ حاصل کیا۔ 

قومی کرکٹ ٹیم کے کپتان کے بعد اس فہرست میں انگلینڈ کے ڈیوڈ ملان کا دوسرا نمبر ہے، انہوں نے 798 ریٹنگ پوائنٹس حاصل کیے۔آسٹریلیا کے ایرون فنچ 733 پوائنٹس کے ساتھ تیسرے نمبر پر موجود ہیں۔

یہ بھی پڑھیں:

ٹی 20 کرکٹ ورلڈ کپ، بھارتی ٹیم کا افغانستان سے مقابلہ آج ہوگا

ٹی 20 ورلڈ کپ، نمیبیا کی اچھی بالنگ کے باعث تیزی سے رنز نہیں ہوئے۔محمد رضوان

ٹی ٹوئنٹی بیٹرز کی عالمی درجہ بندی میں پاکستان کے وکٹ کیپر محمد رضوان کا نمبر چوتھا ہے جن کے  پوائنٹس 731 رہے۔ قومی ٹیم بھی آئی سی سی مینز ٹی 20 ٹیمز رینکنگ میں دوسرے نمبر پر پہنچ گئی۔ 

بھارت اور نیوزی لینڈ کے بعد دبئی اسٹیڈیم میں افغانستان کے خلاف 5 وکٹوں سے کامیابی کی بدولت پاکستان نے عالمی رینکنگ میں دوسری پوزیشن حاصل کی ہے۔ ماہرین کا کہنا ہے کہ کامیابیوں کا سلسلہ جاری رہے گا۔ 

پاکستانی ٹیم کے کپتان بابر اعظم کا کہنا ہے کہ ٹی ٹوئنٹی رینکنگ میں دوبارہ پہلی پوزیشن حاصل کرنا میرے لیے حوصلہ افزاء رہا تاہم مجھے زیادہ خوشی پاکستان کرکٹ ٹیم کی درجہ بندی میں دوسری پوزیشن حاصل کرنے سے ہوئی۔

کپتان بابر اعظم نے کہا کہ ٹیم نے ورلڈ کپ میں سیمی فائنل کے لیے کوالیفائی کیا اور دوسری پوزیشن حاصل کی، یہ اہم کامیابیاں ہیں جن سے مجھے خوشی ہوئی۔ کرکٹ ایک ٹیم گیم ہے۔ ٹیم کے ہر کھلاڑی کا فتوحات میں بھرپور حصہ ہے۔ 

بابر اعظم نے کہا کہ پاکستان نے بھارت، نیوزی لینڈ اور نمیبیا کے خلاف کامیابی حاصل کرکے سیمی فائنل میں جگہ بنائی، ہم بطور قومی کرکٹ ٹیم ٹی ٹوئنٹی ورلڈ کپ میں جیت کا تسلسل برقرار رکھنے کی ہر ممکن کوشش کریں گے۔