کراچی سے گاڑیاں چرانے والے 8 ملزمان گرفتار، 2کاریں، 1 رکشہ اور 4موٹر سائیکلز برآمد

اے وی ایل سی پولیس نے کراچی سے گاڑیاں چرانے اور چھیننے والے 8 ملزمان گرفتار کر لیے جن کے قبضے سے 2 کاریں، 1 رکشہ اور 4 موٹر سائیکلز برآمد ہوئی ہیں۔

تفصیلات کے مطابق اے وی ایل سی نارتھ ناظم آباد، بلدیہ، کیماڑی اور کورنگی نے کارروائی کرتے ہوئے مختلف گروہوں سے تعلق رکھنے والے 8 ملزمان کو گرفتار کرکے ان کے قبضے سے موٹر سائیکلز، رکشہ اور کاریں برآمد کیں۔

یہ بھی پڑھیں:

کراچی پولیس کی کارروائی، خواتین سے لوٹ مار میں ملوث گینگ کے 2 ارکان گرفتار

گرفتار ملزمان کے متعلق اے وی ایل سی کا کہنا ہے کہ ملزم کامران چوری کی متعدد وارداتوں میں ملوث ہے جبکہ ملزم کی گرفتاری کا سابقہ ریکارڈ بھی موجود ہے۔ ملزم امان اللہ بھی رکشہ چھیننے کی وارداتوں میں مطلوب تھا۔

موٹر سائیکل چوری کرنے والے ملزمان نشے کے عادی ہیں جو نشے کیلئے موٹر سائیکلز بیچ دیتے ہیں۔ ملزمان کے مفرور ساتھیوں اور مزید گاڑیاں برآمد کرنے کیلئے چھاپے مارے جارہے ہیں۔ ملزمان سے مزید تفتیش جاری ہے۔ 

خیال رہے کہ اس سے قبل کراچی پولیس نے خواتین کو لوٹنے کی متعدد وارداتوں میں مطلوب گینگ کے 2 ارکان کو رنگے ہاتھوں گرفتار کیا۔ گرفتاری گزشتہ شب گلستانِ جوہر سے عمل میں لائی گئی۔

گزشتہ شب پولیس نے گرفتار ملزمان امجد اور شہزاد کو گلستانِ جوہر سے گھر کی دہلیز پر خواتین سے لوٹ مار کے دوران گرفتار کیا۔ تفتیش کے دوران ملزم امجد نے بتایا کہ وہ خواتین سے لوٹ مار کے گینگ کا رکن ہے جس کے مجموعی طور پر 6 رکن وارداتیں اور لوٹ مار کرتے ہیں۔