ٹی ٹوئنٹی میچ اور ون ڈے سیریز، آسٹریلیا کی وائٹ بال ٹیم پاکستان پہنچ گئی

لاہور: پاکستان اور آسٹریلیا کے مابین ایک ٹی 20 میچ اور 3 ون ڈے میچز پر مشتمل سیریز کھیلنے کیلئے مہمان ٹیم کا وائٹ بال اسکواڈ پاکستان پہنچ گیا ہے۔

تفصیلات کے مطابق آسٹریلین وائٹ بال ٹیم کے 14 کھلاڑی چارٹرڈ فلائٹ کے ذریعے لاہور پہنچ گئے جہاں پہلے ہی دونوں ممالک کے مابین ٹیسٹ سیریز جاری ہے جس کے آخری میچ کا آج چوتھا روز ہے جس میں آسٹریلیا کا پلڑا بھاری نظر آتا ہے۔

یہ بھی پڑھیں:

بابر اعظم آئی سی سی ٹیسٹ رینکنگ میں ٹاپ 5 پر پہنچ گئے

ٹیسٹ ٹیم کے کپتان ایرون فنچ کے ہمراہ ایڈم زمپا، مارکس اسٹوئنس، بین مکڈر موٹ، بین ڈوار شوئس، نیتھن ایلس، جیسن بہرن ڈورف، سین ایبٹ پر مشتمل ون ڈے اور ٹی 20 اسکواڈ لاہور پہنچا۔ ون ڈے سیریز کا پہلا میچ 29مارچ کو قذافی اسٹیڈیم میں ہوگا۔

پاکستان اور آسٹریلیا کے مابین پہلا میچ 3 بجے سہ پہر کو کھیلا جائے گا۔ ون ڈے سیریز کا دوسرا میچ جمعرات 31 مارچ جبکہ تیسرا 2 اپریل کو ہوگا۔ دونوں ٹیموں کے مابین واحد ٹی 20 میچ 5 اپریل کو رات ساڑھے 8 بجے کھیلا جائے گا۔ 

خیال رہے کہ پاکستان اور آسٹریلیا کے مابین 3 ٹیسٹ میچز پر مبنی سیریز کا کھیل جاری ہے جس کے پہلے 2 میچز ڈرا ہوئے جبکہ تیسرے میچ میں آسٹریلیا نے پہلی اننگز میں 391 رنز بنائے۔ قومی کرکٹ ٹیم 268 رنز پر پویلین لوٹ گئی تھی۔