آڈیو لیک کا معاملہ، ایف آئی اے نے شوکت ترین کو طلب کرلیا

اسلام آباد: وفاقی تحقیقاتی ادارے (ایف آئی اے) نے سابق وزیر خزانہ شوکت ترین کو آڈیو لیک کے معاملے پر طلب کرلیا۔

تفصیلات کے مطابق سابق وزیرخزانہ شوکت ترین اور وزیرخزانہ خیبر پختونخوا تیمور جھگڑا کے درمیان فون کال کے معاملے پرایف آئی سائبر کرائم سرکل اسلام آباد نے سابق وزیرخزانہ کو طلبی کا نوٹس جاری کردیا۔ شوکت ترین کو 21 ستمبر صبع 10 بجے سائبر رپورٹنگ سینٹر اسلام آباد میں پیش ہونے کے لیے کہا گیا ہے۔

ایف آئی اے کے نوٹس میں کہا گیا ہے کہ سابق وزیرخزانہ شوکت ترین کے خلاف انکوائری 15 ستمبر کو ارشد محمود کی درخواست پر خیبرپختونخوا کے وزیرخزانہ تیمور جھگڑا سے فون کال کی بنیاد پر شروع کی گئی۔

یہ بھی پڑھیں:

مولانا فضل الرحمن نے ٹرانسجینڈر قانون میں ترامیم پیش کرنے کا اعلان کردیا

نوٹس میں شوکت ترین کو مخاطب کرکے کہا گیا ہے کہ فون کال میں آپ تیمور جھگڑا کو اکسا رہے ہیں کہ خیبر پختونخواہ حکومت وفاقی حکومت کو فسکل بجٹ کی اضافی رقم واپس نہیں کرے تاکہ ایسا کرنے سے وفاقی حکومت اور آئی ایم ایف کے درمیان مسائل پیدا ہوں۔

آپ ذاتی حیثیت میں 21 ستمبر صبع 10 بجے ایف آئی اے سائبر کرائم سرکل میں پیش ہوں تاکہ آپکا بیان ریکارڈ کیا جاسکے۔ اگر آپ حاضر نہ ہوئے تو سمجھا جائے گا کہ آپ کے پاس دفاع میں کہنے کو کچھ نہیں ہے۔

یاد رہے کہ گزشتہ مہینے شوکت ترین اورتیمور جھگڑا اور پنجاب کے وزیرخزانہ محسن لغاری کی فون پر کی گئی گفتگو منظر عام پر آئی تھی جس میں سابق وزیرخزانہ مختلف اقدامات کے ذریعے وفاقی حکومت پر دباؤ بڑھانے کے بارے میں بات کررہے تھے۔