کراچی میں کن کن مقامات پر مویشی منڈیاں قائم ہوں گی، مکمل تفصیلات

کراچی میٹروپولیٹن کارپوریشن (کے ایم سی) نے عیدالاضحی سے قبل شہر بھر میں قربانی کے جانوروں کے لیے نو مقامات پر مویشی منڈیوں کے قیام کا حتمی منصوبہ تیار کر لیا ہے۔

مقررہ مقامات درج ذیل ہیں:

• نیو کراچی کے سیکٹر 11-D میں سنڈے کار بازار

• سمن آباد تھانے کے قریب KMC گراؤنڈ

• سرجانی ٹاؤن میں نادرن بائی پاس سلاٹر ہاؤس

• سرجانی میں کیٹل کالونی

• بن قاسم میں کیٹل کالونی

• چکن فیڈ مل گراؤنڈ

• کورنگی انڈسٹریل روڈ پر مویشی منڈی

• لیاری کے علاقے بکر پیری میں مویشی منڈی

• گلستانِ جوہر میں سفاری پارک کے پیچھے KMC گراؤنڈ

یہ تفصیلات میئر کراچی بیرسٹر مرتضیٰ وہاب کو عیدالاضحی کی تیاریوں کے سلسلے میں ہونے والے ایک جائزہ اجلاس کے دوران فراہم کی گئیں۔ اجلاس میں مویشی منڈیوں کی تیاری، انتظامی سہولیات اور ان کے مؤثر انعقاد پر گفتگو کی گئی۔

میئر وہاب نے متعلقہ محکموں کو ہدایت دی کہ وہ منڈیوں میں مناسب سہولیات فراہم کریں، صفائی کا خاص خیال رکھیں اور ٹیکس کی وصولی میں شفافیت یقینی بنائیں تاکہ عید کے موقع پر شہریوں اور بیوپاریوں کو منظم اور سہل تجربہ میسر آ سکے۔

جانوروں کی آورد شروع

دریں اثنا شہر کی سب سے بڑی موسمی مویشی منڈیوں میں سے ایک نادرن بائی پاس پر قائم منڈی میں قربانی کے جانوروں کی آمد شروع ہو چکی ہے۔

نادرن بائی پاس مویشی منڈی کے منتظم شہاب علی کے مطابق اس سال کی تیاریاں عیدالفطر کے فوراً بعد ہی شروع کر دی گئی تھیں، جو گزشتہ برسوں کی نسبت کافی پہلے کا آغاز ہے۔ مویشی تاجِر جاوید بھٹی نے احمدپور شرقیہ سے 27 بیل اور گائیں لے کر پہلا ٹرک روانہ کیا، جو منڈی میں پہنچ چکا ہے۔