افغان صدر اشرف غنی امریکا پہنچ گئے،آج جو بائیڈن سے ملاقات ہوگی

واشنگٹن:افغانستان کے صدر اشرف غنی اور اعلیٰ قومی مصالحتی کونسل کے چیئرمین عبداللہ عبداللہ امریکا پہنچ گئے،آج وائٹ ہاؤس میں امریکی صدر جو بائیڈن سے ملاقات کریں گے۔

افغان صدر اشرف غنی امریکی صدر جو بائیڈن کے علاوہ کانگریس اور سینیٹ کے ممبران اور متعدد دیگر عہدیداروں سے بھی دوطرفہ تعلقات کا ایک نیا باب شروع کرنے پر بات چیت کریں گے۔ان مذاکرات میں خاص طور پر افغان سکیورٹی فورسز اور دفاعی دستوں کی حمایت جاری رکھنے پر بات چیت کی جائے گی۔

افغانستان کے صدر اشرف غنی اور اعلیٰ قومی مصالحتی کونسل کے چیئرمین عبداللہ عبداللہ امریکہ پہنچ گئے۔ جمعہ کو وائٹ ہاؤس میں امریکی صدر جو بائیڈن سے ملاقات کریں گے۔ pic.twitter.com/kW2Qec1oKF

— افغان اردو (@AfghanUrdu) June 24, 2021

دوسری جانب افغانستان میں امریکا اور نیٹو افواج کے انخلا کی آخری تاریخ گیارہ ستمبر کے قریب آنے کے ساتھ ساتھ طالبان کی پیش قدمی میں تیزی آ گئی ہے اور تازہ ترین اطلاعات کے مطابق ملک کے 421 اضلاع میں سے 85 اضلاع پر طالبان اپنے قبضہ جما چکے ہیں۔

مزید پڑھیں: غیر ملکی افواج کا انخلاء اور افغانستان کے حالات

واضح رہے کہ یہ ملاقات ایک ایسے وقت میں ہو رہی ہے جب افغان حکومت اور طالبان کے درمیان قطر کے دارالحکومت دوحہ میں بین الافغان امن مذاکرات عملاً سست روی کا شکار ہیں اور افغانستان میں طالبان کی جانب سے مختلف اضلاع پر قبضوں کا سلسلہ جاری ہے۔

اس وقت افغان فورسز اور طالبان کے درمیان ملک کے 34 صوبوں میں سے 28 میں لڑائی جاری ہے جب کہ طالبان 150 سے زائد اضلاع پر قبضے کا دعویٰ کر رہے ہیں تاہم طالبان کے ان دعوؤں کی آزاد ذرائع سے تصدیق نہیں ہو سکی۔