گوگل نیوز پر ہمیں فالو کریںکراچی: سندھ حکومت نے مختلف محکموں میں فوتی کوٹے کے تحت 318 ملازمتوں کی منظوری دے دی ہے جس سے اب تک اسی کوٹے میں منظور شدہ ملازمتوں کی تعداد 6 ہزار 777 ہو گئی۔
تفصیلات کے مطابق چیف سیکریٹری سندھ سید ممتاز علی شاہ کی زیر صدارت فوتی کوٹا پر عملدرآمد کے متعلق اجلاس منعقد ہوا جس میں اہم فیصلوں کے علاوہ مختلف محکموں میں وفات پا جانے والے ملازمین کے بچوں کو نوکری دینے کی منظوری دی گئی ہے۔
مذکورہ اجلاس میں ایڈیشنل چیف سیکریٹری داخلہ اور سینیئر ممبر بورڈ آف ریونیو سمیت مختلف محکموں کے سیکریٹریز شریک تھے۔ اجلاس میں چیف سیکرٹری سید ممتاز شاہ نے بتایا کہ اب تک فوتی کوٹا عملدرآمد پر 6777 ملازمتوں کی منظوری دی گئی ہے۔
دورانِ اجلاس چیف سیکریٹری سندھ نے کہا کہ موجودہ اجلاس کے ذریعے مختلف محکموں میں 318 ملازمتوں کی منظوری دی جا رہی ہے۔ محکمہ صحت 48، ریونیو 7،بلدیات 45، اسکول ایجوکیشن 110 جبکہ ورکس سروسز میں 8 ملازمتوں کی منظوری دی گئی۔
چیف سیکریٹری سندھ کے مطابق محکمہ ایکسائز میں 8، خوراک 5، کالج ایجوکیشن 10، پاپولیشن 2، قانون 1 جبکہ آبپاشی میں 50 ملازمتوں کی منظوری دی گئی۔ محکمہ داخلہ 1، اینٹی کرپشن 1، لائیو اسٹاک 4، پبلک ہیلتھ انجینئرنگ 3، ثقافت 1 اور زراعت میں 12 ملازمتیں منظور ہوئیں۔
سید ممتاز شاہ نے تمام سیکریٹریز کو فوتی کوٹا درخواستوں کو جلد مکمل کرنے اور کمیٹی کے گزشتہ منظور شدہ کیسز کی تنخواہیں جاری کرنے کی ہدایت کی۔ چیف سیکریٹری سندھ نے تمام ضلعی ڈپٹی کمشنر کو ڈی آر سی اجلاس بلانے کی بھی ہدایت کردی۔
یہ بھی پڑھیں: مالی بحران،جامعہ اُردو کے ملازمین کو تنخواہیں نہ دی جاسکیں
