ایف بی ایئریا بلاک 18میں ایک اور عمارت گرنے کیلئے تیار

کراچی:فیڈرل بی ایئریا میں ایک اور عمارت گرنے کے لیے تیار ہے۔ ایس بی سی اے افسران کی سنگین غفلت سے عمارت کسی بھی وقت زمین بوس ہو سکتی ہے۔ ایف بی ایریا بلاک اٹھارہ میں میں چار منزلہ عمارت خستہ ہوچکی ہے، جو کسی بھی وقت گر سکتی ہے۔

علاقہ مکینوں کا کہنا ہے قریبی تھانے میں اطلاع دی ہے لیکن پولیس کے کانوں پر جو ں تک نہیں رینگی۔ اہل علاقہ کا کہنا ہے اس بلڈنگ کو فی الفور خالی کرایا جائے تاکہ کسی بھی حادثہ سے بچا جاسکے۔

تاہم ابھی تک نہ تو کراچی اور ضلعی انتظامیہ متحرک ہوئی ہے نہ علاقہ پولیس حرکت میں آ رہی ہے۔ سندھ بلڈنگ کنٹرول اتھارٹی نے صرف ایک ہی کام پر توجہ دی ہوئی ہے کہ جہاں غیر قانونی تعمیرات ہو رہی ہوں بس وہاں سے لاکھوں روپے رشوت وصول کرنا ہے۔

مخدوش عمارتوں کے مکینوں سے بھاری نذرانہ وصول کر کے انہیں موت کے منہ میں بے یار مددگار چھوڑ دیا جاتا ہے۔ اب تک ایک سال میں 5 عمارتیں زمین بوس ہوچکی ہیں،جن میں درجنوں قیمتی جانیں ضائع ہوچکی ہیں۔

علاقہ مکینوں نے گورنر و وزیر اعلیٰ سندھ،وزیر بلدیات، سیکریٹری بلدیات اور ڈی جی سندھ بلڈنگ کنٹرول اتھارٹی سے مطالبہ کیا ہے کہ وہ فوری نوٹس لیں، کیوں کہ مذکورہ عمارت کے پلرز جگہ چھوڑ چکے ہیں۔