وزیر اعظم کے مشیر امیر مقام نواز شریف سے ملاقات کیلئے لندن روانہ

اسلام آباد: وزیر اعظم شہباز شریف کے مشیر برائے سیاسی و عوامی امور امیر مقام مسلم لیگ (ن) کے قائد میاں نواز شریف سے ملاقات کیلئے برطانیہ کے دارالحکومت لندن روانہ ہوگئے ہیں۔

سماجی رابطے کی ویب سائٹ ٹوئٹر پر مشیرِ سیاسی و عوامی امور کی جانب سے آگاہ کیا گیا کہ امیر مقام پارٹی قائد میاں نواز شریف سے خصوصی ملاقات کیلئے لندن روانہ ہوئے ہیں۔

ٹوئٹر پیغام میں کہا گیا کہ مسلم لیگ (ن) خیبر پختونخوا کے صدر انجینئر امیر مقام پارٹی قائد نواز شریف سے ملاقات کے دوران پارٹی امور اور ملک کی موجودہ صورتحال پر تبادلۂ خیال کریں گے۔ 

پارٹی قائد میاں محمد نواز شریف سے خصوصی ملاقات کیلئے وزیراعظم کے مشیر برائے سیاسی و عوامی امور و صدر پاکستان مسلم لیگ ن خیبرپختونخواہ انجینئر امیرمقام لندن روانہ۔
پارٹی قائد نوازشریف سے ملاقات میں پارٹی امور و ملکی موجودہ صورتحال پر تبادلہ خیال کرینگے۔

— Amir Muqam (@AmirMuqamAM) June 23, 2022

خیال رہے کہ وزیر اعظم کے مشیر امیر مقام کی نواز شریف سے ملاقات کیلئے لندن روانگی اپنی نوعیت کا کوئی پہلا واقعہ نہیں ہے۔ قبل ازیں وزیر اعظم اور کابینہ نے بھی نواز شریف سے ملاقات کی۔

وزیر اعظم شہباز شریف کی زیرِ قیادت وفاقی کابینہ میں وزیرِ اطلاعات مریم اورنگزیب، وزیر داخلہ رانا ثناء اللہ اور دیگر وزراء بھی گزشتہ ماہ نواز شریف سے ملاقات کیلئے لندن پہنچ گئے تھے۔

پاکستان تحریکِ انصاف کی قیادت بالخصوص سابق وزیر اعظم عمران خان نے موجودہ وزیر اعظم شہباز شریف سمیت وفاقی کابینہ کی لندن موجودگی کو کڑی تنقید کا نشانہ بنایا تھا۔