گوگل نیوز پر ہمیں فالو کریںانتخابات کے پس منظر میں جے یو آئی سندھ کے سیکرٹری جنرل علامہ راشد محمود سومرو کے ایک متنازع سیاسی “فتوی” نے لوگوں کو شدید حیرت زدہ کر دیا ہے۔
علامہ راشد سومور نے سندھ کے ایک شہر میں انتخابی مہم کے دوران پبلک کارنر میٹنگ سے خطاب کرتے ہوئے عوام کو ووٹ کی ترغیب دینے کیلئے گناہ و ثواب کا سارا حساب اپنے ذمے لے لیا۔
انہوں نے بظاہر علاقے میں مخالف امیدوار کی جانب سے ووٹ کیلئے پیسے بانٹے جانے کے پس منظر میں دوران خطاب کہا کہ قرآن پہ حلف اٹھاکر مخالفین سے پیسے لیں، مگر ووٹ انہیں نہ دیں، میں فتویٰ جاری کرتا ہوں کہ آپ گناہ گار نہ ہوں گے۔
ان کی اس گفتگو پر شدید تنقید کی جا رہی ہے اور کہا جا رہا ہے کہ وہ بالواسطہ طور پر رشوت کو فروغ دے رہے ہیں اور ووٹ جیسے اہم قومی فریضے اور ذمے داری کو متنازع بنانے کی کوشش کر رہے ہیں۔
سوشل میڈیا پر جہاں بہت سے ناقدین قرآن کے حلف کی خلاف ورزی کرنے کی ترغیب پر افسوس کا اظہار کر رہے ہیں وہاں بہت سے صارفین پیسوں سے ووٹ خریدنے کے عمل کو بھی تنقید کا نشانہ بنا رہے ہیں۔
