عالیہ حمزہ ملک نے وزیراعظم پر تنقید کرنیوالوں کو خونی لبرلز قرار دیدیا

اسلام آباد :پاکستان تحریکِ انصاف کی رکنِ قومی اسمبلی عالیہ حمزہ ملک نے کہا ہے کہ خونی لبرلز سے کہوں گی کہ عمران خان کے بیان کو پہلے اچھی طرح سنیں۔

ایک انٹرویومیں عالیہ حمزہ ملک نے کہا کہ زیادتی کیس کی گفتگو میں وزیرِ اعظم عمران خان نے مشرق اور مغرب کا موازنہ پیش کیا۔

انہوں نے کہا کہ وزیرِ اعظم عمران خان نے زیادتی کرنے والوں کیلئے سخت قانون بنائے ہیں، ریاست اپنی ذمہ داری نبھا رہی ہے، ہمارا کام ہے کہ سخت قانون سازی کریں۔

عالیہ حمزہ ملک نے کہا کہ جس طرح وزیرِ اعظم عمران خان خواتین و بچوں کے تحفظ کی بات کرتے ہیں اس سے پہلے کبھی نہیں ہوئی۔

مزید پڑھیں:جنسی زیادتی کی وجہ خواتین کا کم کپڑے پہننا نہیں، طاقت کا نشہ ہے۔عثمان خالد بٹ

انہوں نے کہا کہ مدرسے میں زیادتی کا واقعہ ہوا تو وزیرِاعظم نے مدرسے میں بھی اصلاحات لانے کا سوچا۔

پی ٹی آئی رہنما نے کہا کہ موٹر وے زیادتی کیس پر بھی ہم نے کہا کہ سخت قوانین بنانے اور عمل کرانے کی ضرورت ہے، خونی لبرلز وزیرِ اعظم عمران خان کے پیچھے پڑے ہیں۔

انہوں نے کہا کہ خونی لبرلز ہی سب سے زیادہ خواتین کے حقوق کی پامالی کرتے ہیں، یہ لوگ اپنے مخصوص بیانیہ کے لیے خواتین کی کردار کشی کرتے ہیں۔

عالیہ حمزہ ملک کا کہنا ہے کہ وزیرِ اعظم عمران خان کی بات کو سیاق و سباق سے ہٹ کر لیا جا رہا ہے۔انہوں نے یہ بھی کہا کہ وزیرِ اعظم عمران خان سے زیادہ خواتین و بچوں کے حقوق کا نہ آج کسی کو احساس ہے اور نہ کل ہو گا۔