کراچی میں کورونا کیسز میں ہولناک اضافہ، ہنگامی اجلاس طلب،سخت پابندیوں کاامکان

کراچی: شہر قائد میں کورونا وائرس کے کیسز میں خطرناک حد تک اضافے کے بعد حکومت نے ہنگامی اجلاس طلب کرلیا ہے اور شہر میں لاک ڈاؤن سمیت سخت پابندیوں کا امکان ہے۔

محکمہ صحت کے مطابق کراچی میں 4469 نمونوں کی جانچ کی گئی جن میں سے 805 میں کورونا مثبت آیا جس کے بعد مثبت کیسز کا تناسب 18 فیصد تک پہنچ گیا۔

کراچی میں کورونا کیسز کی شرح میں خطرناک حد تک اضافے کے بعد وزیرصحت عذرا فضل پیچوہو کی سربراہی میں سندھ کی وزارت صحت نے کورونا ٹاسک فورس کا ہنگامی اجلاس طلب کیا ہے۔

اجلاس آج دوپہر کو محکمہ صحت کے دفتر میں ہوگا، جہاں کیسز کو کم کرنے کے لیے درکار اقدامات کے حوالے سے تجاویز پر غور کیا جائے گا۔

واضح رہے کہ کورونا وائرس کی نئی قسم اومی کرون ویرینٹ پھیلنے کے بعد ملک میں وباء نے مزید 1467 افراد کو متاثر کیاجبکہ دو افراد کی جان لے لی۔

مزید پڑھیں:پاکستان میں کورونا متاثرین میں مزید اضافہ، 1467 نئے کیسز،2 اموات

این سی او سی کی طرف سے جاری کردہ تازہ ترین اعداد و شمار کے مطابق دو نئی اموات کے بعد اموات کی مجموعی تعداد 28974 ہو گئی ہے جبکہ نئے 1467 کیسز شامل کرنے کے بعد متاثرین کی تعداد 1307174 ہو گئی ہے۔

گزشتہ 24 گھنٹوں کے دوران پاکستان بھر میں 43540 ٹیسٹ کیے گئے جب کہ مثبت کیسز کا تناسب 3اعشاریہ33 فیصد رہا اورانتہائی نگہداشت میں مریضوں کی تعداد 615 تھی۔

266 مریض اس وائرس سے صحت یاب ہوئے ہیں جبکہ صحت یاب ہونے والوں کی کل تعداد 1259253 رہی۔ منگل تک ملک میں فعال کیسز کی کل تعداد 18947 ریکارڈ کی گئی۔