گوگل نیوز پر ہمیں فالو کریںبراعظم افریقہ کے ملک برکینا فاسو میں چرچ پر دہشت گردوں کے حملے میں پادری سمیت 14 افراد ہلاک ہوگئے ہیں جبکہ یہ واقعہ برکینا فاسو کے شہر ہنتو کورا میں پیش آیا۔
بین الاقوامی میڈیا کے مطابق گزشتہ روز سنڈے سروس کی مذہبی تقریبات کے دوران متعدد دہشت گرد چرچ میں گھس گئے اور نہتے شہریوں پر فائرنگ شروع کردی۔
مسلح افراد نے آتشیں ہتھیاروں سے غیر مسلح شہریوں کو نشانہ بناتے ہوئے کم از کم 14 افراد کو ہلاک اور متعدد کو زخمی کردیا ، جس کے بعد ریسکیو کی ٹیمیں اور قانون نافذ کرنے والے ادارے جائے وقوعہ پر پہنچے۔
مقامی حکومت نے اعلان کیا ہے کہ متعدد لوگ زخمی ہے جنہیں طبی امداد دی جائے گی، جبکہ عالمی میڈیا کے مطابق مسلح حملہ آوروں نے یہ کہتے ہوئے لوگوں پر گولیاں چلائیں کہ ”ہم پادری اور بچوں سمیت انہیں نشانہ بنا رہے ہیں جو (ملک سے) وفادار ہیں۔“تاہم ابھی تک کسی عالمی دہشت گرد تنظیم نے واقعے کی ذمہ داری قبول نہیں کی۔
