امریکا پاکستان سے واضح طور پر دور جا چکا ہے۔ایڈمرل مائیک میولن

واشنگٹن: سابق امریکی چیئرمین جوائنٹ چیفس آف اسٹاف ایڈمرل مائیک میولن نے کہا ہے کہ امریکا واضح طور پر پاکستان سے دور جا چکا ہے جبکہ وائٹ ہاؤس اور امریکی محکمۂ خارجہ نے پاکستان کی سیاست میں امریکا کے کردار کے دعوے مسترد کردئیے۔

تفصیلات کے مطابق سابق سربراہ امریکی افواج نے اپنے ایک بیان میں کہا کہ پاکستان اور امریکا واضح طور پر دور ہوچکے ہیں۔ ان سے پوچھا گیا کہ دہشت گردی کے خلاف جنگ میں پاکستان امریکا کا اتحادی تھا۔ اب آپ پاک امریکا تعلقات پر کیا کہتے ہیں؟

یہ بھی پڑھیں:

آیا صوفیہ مسجد میں 88 برس بعد نماز تراویح کی ادائیگی

ایڈمرل مائیک میولن نے کہا کہ یہ کہنا مشکل بلکہ بہت مشکل ہے۔ میرا ذاتی خیال ہے کہ ہم نے گزشتہ ایک دہائی سے خود کو پاکستان سے واضح طور پر دور کیا ہے۔ اسی دوران پاکستان بھی رفتہ رفتہ چین کی چھتری تلے چلا گیا۔

امریکی میڈیا سے گفتگو کے دوران سابق امریکی عسکری سربراہ نے کہا کہ چین پاکستان کے پڑوس میں اور اس کا بڑا حمایتی ہے اور یہ قربت چین کے بین الاقوامی مقاصد کے حصول کیلئے بہتر بھی ہے۔ بیجنگ بھی ایسے ہی پڑوسی کی خواہش رکھتا ہے۔

واضح رہے کہ ایڈمرل مائیک میولن 2007 سے 2011 تک چیئرمین جوائنٹ چیفس آف اسٹاف کے عہچے پر فائز رہے۔ انہیں میموگیٹ اسکینڈل میں نامزد کیا گیا تھا۔ سابق عسکری سربراہ نے کہا کہ پاکستان اور امریکا کے تعلقات میں کچھ وقت سے مشکات ہیں۔

پاکستان پر الزام تراشی کرتے ہوئے سابق چیئرمین جوائنٹ چیفس آف اسٹاف مائیک میولن نے کہا کہ پاکستانی حکومت نے یقینی طور پر کابل پر طالبان کے قبضے کو روکنے کیلئے بہت سے اقدامات نہیں اٹھائے۔ پاکستان اور افغانستان میں اب بھی رابطے ہیں۔