بہائو الدین زکریا یونیورسٹی کے لیکچرار کو مذہبی منافرت کے الزام میں پھانسی کی سزا

ملتان :ملتان کی بہائو الدین زکریا یونیورسٹی کے لیکچرار جنید حفیظ کو مذہبی منافرت پھیلانے کے الزام میں پھانسی کی سزا سنا دی گئی ہے۔

ایڈیشنل ڈسٹرکٹ اینڈ سیشن جج ملتان نے مذہبی منافرت پھیلانے کے الزام میں گرفتار سابق یونیورسٹی لیکچرار کو موت کی سزا کا حکم دیا۔

عدالت کی جانب سے سابق یونیورسٹی لیکچرار کو دیگر الزامات ثابت ہونے پر عمر قید اور 10 سال قید کا بھی حکم سنایا گیا اور ان پر 5 لاکھ روپے کا جرمانہ بھی عائد کیا گیا ہے۔

مزید پڑھیں:مریم نواز کا نام ای سی ایل سے نکالنے سے متعلق سفارشات وزیراعظم کو ارسال

ذرائع کے مطابق حکومتی پراسیکوٹر ضیا الرحمن چوہدری نے بتایا کہ ایڈیشنل سیشن جج کاشف قیوم نے سینٹرل جیل ملتان میں کیس کا فیصلہ سنایا جس میں ملزم جنید حفیظ کو دفعہ 295 اے، بی اور سی کا مرتکب قرار دیتے ہوئے سزا سنائی گئی ہے۔

عمر قید اور قید کی سزا پوری ہونے پر پھانسی کی سزا دی جائے گی۔کیس کی سماعت کے دوران ملزم کے خلاف 15 گواہوں کی شہادتیں اور زیر دفعہ 342 کے بیانات مکمل کیے گئے ۔

مقدمے کے بقیہ 11 گواہوں کو غیر ضروری جان کر ترک کر دیا گیا۔عدالتی فیصلے پر ردعمل دیتے ہوئے ملزم جنید حفیظ کے اہل خانہ کا کہنا ہے کہ وہ فیصلے کے خلاف اپیل دائر کریں گے۔