ایبٹ آباد:70لاکھ پراپرٹی ٹیکس کی عدم ادائیگی پر مانسہرہ گرڈ اسٹیشن سیل کر دیا گیا

ایبٹ آباد:70لاکھ پراپرٹی ٹیکس عدم ادائیگی پر مانسہرہ گرڈ اسٹیشن سیل کر دیا گیا۔یہ کارروائی ایکسائز ٹیکسیشن افسر عمار خان کی نگرانی کی مکمل کی گئی،جس کے احکامات صوبائی سیکرٹری ایکسائز کی جانب سے جاری کیے گئے تھے۔

محکمہ ایکسائز، ٹیکسیشن اینڈ نارکاٹکس کے عملے نے آفیسر عمار خان کی نگرانی میں کارروائی کے دوران مانسہرہ گرڈ اسٹیشن کو سیل کیا۔بعد ازاں رابطہ کرنے پر انہوں نے بتایا کہ مذکورہ گرڈ کے ذمہ ایک عشرہ سے بقایا جات بقایا چلے آرہے تھے۔

جن کی ادائیگی سے متعلق متعدد نوٹسز جاری کرنے کے باوجود کوئی پیش رفت نہ ہوئی تو صوبائی سیکرٹری ایکسائز نے گرڈ اسٹیشن سیل کرنے کے احکامات جاری کر دیئے جس پر جمعرات کے روز عملدرآمد کیا گیا۔

ایک سوال کے جواب میں ان کا کہنا تھا کہ قانونی طور پر سیل کردہ مقامات کے بقایا جات ادا نہ کئے جائیں تو نیلامی کے ذریعے مذکورہ ٹیکس وصول کیا جاتا ہے تاہم مانسہرہ گرڈ کے خلاف یہ ابتدائی کارروائی ہے جس پر کوئی فیصلہ صوبائی محکمہ کی طرف سے کیا جائے گا۔

تاہم انہوں نے توقع ظاہر کی کہ محکمہ پیسکو ٹیکس ادائیگی میں پیش رفت کرکے کسی مزید قدم سے پہلے ہی اسے نبھانے کی کوشش ضرور کرے گا۔