گوگل نیوز پر ہمیں فالو کریںبھارت میں ایک دلچسپ واقعے میں شادی کی تقریب کے دوران دولہا کو اپنی دلہن سے سرِ عام محبت کا مظاہرہ کرنا مہنگا پڑگیا۔
موقر معاصر ایکسپریس نے بھارتی میڈیا کے حوالے سے رپورٹ کیا ہے کہ گزشتہ ہفتے اتر پردیش میں شادی کی تقریب اس وقت میدان جنگ میں تبدیل ہوگئی جب دولہا نے اپنی دلہن کا سب کے سامنے بوسہ لیا۔
دولہا کا یہ فعل لڑکی کے اہلخانہ کو شدید ناگوار گزرا اور انہوں نے دے مار ساڑھے چار دولہا اور اسکے رشتے داروں پر دھاوا بول دیا۔
دلہن کے گھر والے مشتعل ہوکر لاٹھیاں اٹھائے اسٹیج پر چڑھ گئے اور دولہا و اسکے اہل خانہ کی دے دھنا دھن پٹائی کردی، تصادم میں دلہن کے والد سمیت چھ افراد زخمی ہوگئے۔
صورتحال کو سنبھالنے کیلئے پولیس کو بلانا پڑا جس نے دونوں خاندانوں کے سات افراد کو حراست میں لے لیا جبکہ زخمیوں کو مقامی اسپتال منتقل کر دیا گیا۔
پولیس کے مطابق دلہن کے والد نے پیر کی رات اپنی دونوں بیٹیوں کی شادیاں رکھی تھیں، پہلی شادی خوش اسلوبی کے ساتھ اختتام پذیر ہوئی جبکہ دوسری تقریب میں یہ ناخوشگوار واقعہ پیش آیا۔
دلہن کے اہل خانہ نے الزام لگایا کہ دولہے نے اسے اسٹیج پر زبردستی بوسہ دیا جبکہ دولہے کا کہنا ہے کہ دلہن نے خود بوسہ لینے پر اصرار کیا تھا۔
بھارتی پولیس کے مطابق ابھی تک دونوں خاندانوں کی طرف سے کوئی تحریری شکایت موصول نہیں ہوئی تاہم گرفتار باراتیوں پر امن عامہ کو خراب کرنے کا الزام عائد کیا گیا ہے۔
