سویڈن میں پاکستانی شہری نے اپنی جان خطرے میں ڈال کر کئی جانیں بچالیں

سویڈن کی ایک رہائشی عمارت میں آتشزدگی کا واقعہ پیش آیا جس کے دوران ایک پاکستانی نے اپنی جان خطرے میں ڈال کر کئی افراد کو جلنے سے بچا لیا۔

سویڈن کے دارالحکومت اسٹاک ہوم سے تقریباً 350 کلو میٹر دور سند سوال نامی شہر کے رہائشی علاقہ میں واقع ایک بلڈنگ میں اچانک آگ بھڑک اٹھی، تاہم ایک پاکستانی شہری اپارٹمنٹ میں گھس کر گھر میں موجود بچے کو عمارت سے باہر نکالنے میں کامیاب ہوگیا۔

بچے کی جان بچانے والے پاکستانی شہری نثار خان کا کہنا ہے کہ وہ اپنی اہلیہ کے ہمراہ گھر پر موجود تھے، اس دوران انہیں قریبی اپارٹمنٹ میں لگی آگ کا معلوم ہوا تو وہ فوری طور ریسکیو کرنے کے لئے آتش زدہ گھر میں گھس گیا۔

نثار نے بتایا کہ اپارٹمنٹ میں تقریباً دس سالہ غیر ملکی بچہ موجود تھا جسے فوری طور پر گھر سے باہر نکال لیا جبکہ انہوں نے ریسکیو عملے کو بروقت اطلاع دیتے ہوئے اس رہائشی عمارت میں رہائش پذیر کئی افراد کو آگ کی لپیٹ میں آنے سے بچا لیا۔

اس دلیرانہ اور غیر معمولی عمل پر پاکستانی شہری نثار خان کی پاکستانی کمیونٹی سمیت دیگر غیر ملکیوں کی جانب سے حوصلہ افزائی کی جا رہی ہے۔