کروڑوں کے نقصان کے بعد شیر شاہ میں گارمنٹ فیکٹری میں لگی آگ پر قابو پالیا گیا

کراچی: شیر شاہ میں گارمنٹ فیکٹری میں لگی آگ پر قابو پالیا گیا۔ کروڑوں روپے کا نقصان ہو گیا، خوش قسمتی سے کوئی جانی نقصان نہیں ہوا، آگ بھڑکنے کے بعد تمام افراد کو با حفاظت باہر نکال لیا گیا۔

آگ شیر شاہ میں پلاٹ نمبر ایف 2 سیکٹرایل اے پر واقع کھاڈی گارمنٹ فیکٹری میں اچانک بھڑک اٹھی تھی۔بلدیہ عظمیٰ کراچی کے محکمہ فائر بریگیڈ کی 3 آگ بجھانے والی گاڑیوں اور ایک اسنارکل نے اس کارروائی میں حصہ لیا۔

ایم ڈی واٹربورڈ کے مطابق آگ کو تیسرے درجہ کی قرار دیدیا گیا،واٹربورڈ کے کرش پلانٹ اور صفورا ہائیڈرنٹس پر ایمرجنسی نافذ کردی گئی، ایم ڈی واٹربورڈ کا مزید کہنا ہے کہ فائربریگیڈ کی مدد کیلئے ہزاروں گیلن پانی سے بھرے متعدد ٹینکرز روانہ کردیئے گئے ہیں۔

اسٹیشن فائر افسر سائٹ توفیق نے ایم ایم نیوز کو بتایا کہ گارمنٹ فیکٹری ہونے کے باعث یہاں کپڑا بہت زیادہ ہوتا ہے اس لیے آگ تیزی سے بھڑج گئی اور اس فیکٹری میں جوکی سلائی مشینوں کے پائیدان لکڑی کے ہونے کے باعث آگ میں شدت آگئی تھی۔

انہوں نے کہا فی الحال یہ بتانا مشکل ہے کہ آگ لگنے کی وجہ کیا تھی، تاہم شام 4 بجے لگنے والی آگ ر ات کے 9 بجے تک بجھا دی گئی تھی۔ابھی بھی کولنگ کا عمل جاری ہے کیوں کہ اندر چنگاریاں دبی ہوتی ہیں اس لیے جب تک آگ کی نشانیاں مکمل طور پر ختم نہیں ہو جاتیں کولنگ کے لیے پانی ڈالا جاتا رہے گا۔