12سالہ بچی کو مگرمچھ نے نگل لیا، مقامی غوطہ خور بچی کی تلاش میں مصروف

سکھر:صالح پٹ میں مگر مچھ کا بچی کو نگلنے کا معاملہ، مقامی غوطہ خور بچی کی تلاش میں مصروف، سکھر ضلع کی تحصیل صالح پٹ کے علاقے تاج فارم کے قریب نارا کینال پر مگر مچھ کی جانب سے بارہ سالہ لڑکی زاہدہ بنت گلبہار خاصخیلی جو نہر پر کپڑے دھو رہی تھی کو نگل لیا تھا۔

معصوم بچی کی لاش 18 سے 20 گھنٹے گزر جانے کے باوجود نہیں مل سکی ہے اور مقامی غوطہ خوروں کی جانب سے نہر میں بچی کی تلاش کا کام جاری ہے۔

تاہم اطلاع کے باوجود اس وقت تک وائلڈ لائف یا انتظامیہ کا کوئی افسر یا ٹیم علاقے میں نہیں پہنچ سکی ہے،معصوم بچی نہر کے کنارے دیگر بچوں کے ہمراہ کپڑے دھونے میں مصروف تھی کہ مگر مچھ نے بچی کو نگل لیا، بچوں کے شور مچانے پر اطراف سے لوگ مدد کے لئے پہنچے، لیکن مگر مچھ نہر میں جا چکا تھا۔

اس حوالے سے رابطہ کرنے پر سکھر کے ڈپٹی کمشنر رانا عدیل نے بتایا کہ بچی کی تلاش کے لیے نیوی اور وائلڈ لائف کی ٹیم علاقے میں بھیجی جارہی ہے جس میں سے نیوی کے اہلکار بچی کی تلاش اور وائلڈ لائف کے اہلکار مگر مچھ کی تلاش کریں گے۔