انتخابی فہرستوں میں ووٹرز کی تصدیق کیلئے گھر گھر جائیں گے۔الیکشن کمیشن

کراچی: الیکشن کمیشن آف پاکستان نے کہا ہے کہ بلدیاتی انتخابات اور آئندہ عام انتخابات کے حوالے سے انتخابی فہرستوں میں اندراج کیلئے گھر گھر جا کر ووٹرز کی تصدیق کی جائے گی۔

تفصیلات کے مطابق ترجمان الیکشن کمشنر سندھ کی جانب سے جاری کردہ بیان کے مطابق اعجاز انور چوہان نے کہا کہ بلدیاتی انتخابات اور آئندہ عام انتخابات کی تیاریوں کے باعث انتخابی فہرستوں میں اندراج، اخراج اور درستگی کیلئے 7 نومبر بروز اتوار سے 6 دسمبر بروز پیر تک گھر گھر جا کر ووٹرز کی تصدیق کی جائے گی۔

یہ بھی پڑھیں:

الیکشن کمیشن میں اپوزیشن کی دستاویزات تک رسائی کی درخواست منظور

الیکشن کمیشن نے اسلام آباد میں بلدیاتی انتخابات کے متعلق فیصلہ محفوظ کرلیا

سینیٹ سے الگ کیے جانے کا خوف ، اسحاق ڈار نے الیکشن کمیشن کو خط لکھ دیا

ترجمان صوبائی الیکشن کمشنر کے بیان کے مطابق 7 دسمبر سے 5 جنوری 2022 تک موجودہ انتخابی فہرستوں کی تصدیق کے بعد ڈیٹا انٹری اور غیر تصدیق شدہ رائے دہندگان سے ٹیلیفون پر رابطہ کرکے ضلعی الیکشن کمشنر کے ذریعے تصدیق کی جائے گی۔ 6 سے 25جنوری تک ابتدائی انتخابی فہرستوں کی نادرا کے ذریعے چھپائی ہوگی۔

اسی دوران لسٹیں ضلعی الیکشن کمشنر کو فراہم کی جائیں گی۔ 26 جنوری سے 24 فروری تک الیکشن ایکٹ کی دفعہ 28 کے تحت انتخابی فہرستوں کی ابتدائی اشاعت اور دعوے، اعتراضات اور اصلاحات کیلئے درخواستیں طلب کی جائیں گی جن پر 26 جنوری سے 11 مارچ تک نظر ثانی اتھارٹیز فیصلے کریں گی۔ میڈیا مہم مقامی سطح پر ہوگی۔

ڈسپلے پیریڈ کی مانیٹرنگ بھی صوبائی، ریجنل یا ضلعی الیکشن کمشنرز مقامی سطح پر کریں گے۔ 12 سے 23مارچ تک نظر ثانی اتھارٹیز کی جانب سے فیصلون کے بعد فارم 15، 16 اور 17 کا اندراج ہوگا۔ 24مارچ سے 12اپریل تک حتمی انتخابی فہرست نادرا کے ذریعے شائع جبکہ 13 اپریل کو ضلعی الیکشن کمشنر آفس میں آویزاں ہوگی۔

صوبائی الیکشن کمشنر کا عوام کے حقِ رائے دہی کے متعلق کہنا ہے کہ ووٹ کے اندراج کیلئے قریبی ڈسپلے سینٹر یا دفتر ضلعی الیکشن کمشنر سے رجوع کرکے ووٹ کا اندراج کروائیں اور ذمے دار پاکستانی ہونے کا حق ادا کریں۔ اپنا شناختی کارڈ نمبر 8300 پر ایس ایم ایس کرکے ووٹ کی معلومات حاصل کریں۔

انہوں نے کہا کہ ووٹ درج کرنے کے فارمز اور ڈسپلے سنٹرز کی تفصیلی معلومات الیکشن کمیشن کی ویب سائٹ پر دستیاب ہے۔ فارم جمع کراتے وقت شناختی کارڈ کی نقل منسلک کریں۔ ووٹر لسٹوں میں ووٹ کا اندراج ضرور کرائیں تاکہ آپ آئندہ انتخابات میں اپنا جمہوری حق استعمال کرکے اپنے پسندیدہ نمائندے کو ووٹ دے سکیں۔