امریکی فوج کو کابل سے انخلا کی تاریخ میں توسیع نہیں دی جائیگی، طالبان کا فیصلہ

واشنگٹن: طالبان کے ترجمان سہیل شاہین کا بی بی سی سے بات کرتے ہوئے کہنا تھا کہ 31 اگست کابل سے امریکی افواج کے انخلا کی آخری تاریخ ہے، جس میں توسیع نہیں کی جائیگی۔

سہیل شاہین نے بی بی سی کے ہلدا حکیم سے بات کرتے ہوئے کہا کہ 31 اگست افغانستان میں امریکی افواج کی موجودگی کی سرخ لائن ہے اور اس میں کسی قسم کی توسیع قطر میں امریکا اور طالبان کے درمیان ہونے والے دوحہ معاہدے کی واضح خلاف ورزی ہوگی۔

پینٹاگون کے ترجمان جون کربے کے مطابق طالبان سے انخلا میں توسیع کے حوالے سے کوئی بات نہیں ہوئی ہے۔ انہوں نے کہا کہ امریکی افواج 31 اگست تک کابل سے اپنا انخلا مکمل کرلیں گی۔جبکہ طالبان ترجمان کا کہنا ہے کہ مغربی افواج کے لیے افغانستان چھوڑنے کی تاریخ میں اضافہ نہیں ہوگا۔

مزید پڑھیں: اُمید ہے 31 اگست تک افغانستان سے انخلا مکمل کریں گے،امریکی صدر

برطانوی وزیر اعظم بورس جانسن کا جی 7 ورچوئل اجلاس میں اپنا موقف دیتے ہوئے کہنا تھا کہ وہ امریکی صدر جو بائیڈن سے ڈیڈ لائن میں توسیع کے لیے درخواست کریں گے۔تاکہ زیادہ سے زیادہ لوگوں کو کابل سے باہر نکالا جاسکے۔

ترجمان کے مطابق ہم حامد کرزئی ایئر پورٹ پر امریکی سرگرمیوں کے حوالے سے طالبان کے ساتھ مستقل رابطے میں ہیں، لیکن ابھی تک ڈیڈ لائن کے تناطر میں کوئی خاص بات نہیں ہوئی ہے۔