گوگل نیوز پر ہمیں فالو کریںلاہور: وزیراعلیٰ پنجاب سردار عثمان بزدار کا کہنا ہے کہ 560 ارب روپے کے ترقیاتی پروگرام پر عملدرآمد کے لئے مانیٹرنگ یونٹ تشکیل دیا جائے گا۔ تمام متعلقہ محکموں کو 31 جولائی تک غیر منظور شدہ اسکیموں کو منظور کرنے کی ہدایت بھی کردی گئی ہے جبکہ اسکیموں کو مکمل کرنے کے لیے ایک ٹائم فریم بھی مرتب کیا جائے گا۔
وزیراعلیٰ ہاؤس سے جاری ہونے والے بیان میں عثمان بزدار نے کہا ہے کہ 560 ارب روپے کا ایک روپیہ بھی ضائع نہیں ہونے دیں گے۔ سالانہ ترقیاتی پروگرام کے فنڈز کا بَروقت اور شفاف استعمال ہر صورت یقینی بنائیں گے۔
ان کا کہنا تھا کہ وہ تاریخ ساز ترقیاتی پروگرام کی ذاتی مانیٹرنگ کریں گے، محکمے اسکیموں پر عملدرآمد کیلئے جامع روڈمیپ مرتب کرکے تیزی سے آگے بڑھیں گے،اسکیموں کےتھرڈ پارٹی آڈٹ کیلئے مؤثر میکانزم تشکیل دیا جائے گا۔
انہوں نے مزید کہا کہ محنت اوراخلاص کے ساتھ عوامی خدمت کا سفر جاری رکھے ہوئے ہیں، اپوزیشن نہیں چاہتی کہ پاکستان ترقی وخوشحالی کی منزل طے کرے، اپوزیشن ٹولہ مستحکم ہوتی معیشت کو نقصان پہنچانے کے درپے ہے۔
عثمان بزدار نے کہا کہ اپوزیشن جماعتیں انتشار پھیلا کر ذاتی ایجنڈے کی تکمیل چاہتی ہیں، بدقسمتی سے اپوزیشن نے قومی مفادات کو پس پشت ڈالا ہوا ہے، عوام منفی سیاست کی بجائے ملک کو آگے بڑھتا ہوا دیکھنا چاہتے ہیں، سازشیں کرنے والے پہلے بھی ناکام رہے اورآئندہ بھی ناکام رہیں گے۔
یہ بھی پڑھیں : وزیراعظم کے دلیرانہ فیصلوں سے اپوزیشن کو سانپ سونگھ گیا ہے، فردوس عاشق اعوان
