جہانگیر ترین ہم خیال گروپ اور وزیر اعظم کی ملاقات کل ہوگی، ذرائع

لاہور: تحریک انصاف کی سینئرلیڈرشپ کی کاوشیں رنگ لے آئیں، ذرائع کے مطابق وزیراعظم اور جہانگیر ترین کے ہم خیال گروپ کے درمیان ملاقات طے پا گئی ہے۔

ذرائع کا کہنا ہے کہ جہانگیر ترین کے حامی اراکین اسمبلی منگل کے روز وزیراعظم کیساتھ ملاقات کرینگے۔ ذرائع کے مطابق کچھ روز قبل جہانگیر ترین کی جانب سے جاری بیان میں یہ کہا گیا تھا کہ ان کی جلد وزیر اعظم سے ملاقات ہوجائے گی۔

جہانگیر ترین نے اپنے بیان میں کہا تھا کہ وزیر اعظم سے دیرینہ تعلق ہے، ان کیساتھ ایسا رشتہ ہے جو کمزور نہیں ہونا چاہیے، گروپ کی جلد وزیراعظم سے ملاقات کی یقین دہانی کرائی گئی ہے۔

جہانگیر ترین نے صحافیوں سے بات کرتے ہوئے کہا تھا کہ مجھ پر بے بنیاد ایف آئی آر بنائی گئی ہیں، سول کیس کو فوجداری میں تبدیل کر دیا گیا۔

اُن کا کہنا تھا کہ عدالت سے انصاف ضرور ملے گا، (ن) لیگ نے اپنے دور میں مجھے ٹیکس نوٹسز بھیجے، ہم کسی کمیٹی سے نہیں، وزیراعظم سے ملیں گے، پورے گروپ نے کہا وزیراعظم ہماری بات سنیں اور ملاقات کریں۔

جہانگیر ترین کا اپنے بیان میں کہنا تھا کہ میں بذات خود وزیر اعظم سے ملاقات نہیں کررہا، میراہم خیال گروپ کل وزیراعظم سے ملاقات کرے گا۔ ذرائع کا کہنا ہے کہ ملاقات کے بعد تناؤ کی صورتحال کا خاتمہ ہوجائے گا۔

مزید پڑھیں: رواں سال پاکستان میں گندم کی پیداوار کا ریکارڈ ٹوٹ جائے گا۔وزیرِ اعظم