عمران خان نے ملک کو قرضوں میں جھونک کر مافیاز کے حوالے کردیا ہے، بلاول بھٹو

کراچی/اسلام آباد: پاکستان پیپلزپارٹی کے چیئرمین بلاول بھٹو زرداری نے رمضان کے مہینے میں ہوشرباء مہنگائی کا ذمہ دار عمران خان اور پی ٹی آئی حکومت کو قرار دیتے ہوئے کہا ہے کہ عمران خان نے ملک کو قرضوں میں جھونک کر مافیاز کے حوالے کردیا ہے۔

بلاول ہاؤس کے میڈیا سیل سے جاری بیان میں چیئرمین پی پی پی بلاول بھٹو زرداری نے کہا ہے کہ رمضان کے آغاز میں گھی، آٹا، دالوں اور گوشت سمیت 16 ضروری اشیاء کی قیمتوں میں اضافہ پی ٹی آئی حکومت کی نااہلی ہے، چیئرمین پی پی پی نے اس مہنگائی کی وجہ بیان کرتے ہوئے کہا کہ عمران خان ملک میں مہنگائی کرنے والی مافیا کی سرپرستی کرکے عوام سے دشمنی کررہے ہیں۔

انہوں نے اس بات پر تشویش کا اظہار کیا کہ عمران خان کے رمضان میں ہر چیز کی نگرانی کے اعلان کے بعد مہنگائی میں خوف ناک اضافہ ہوچکا ہے، اس موقع پر چیئرمین بلاول بھٹو زرداری نے موجودہ حکومت پر کڑی تنقید کرتے ہوئے کہا کہ سلیکٹڈ حکومت نے عوام کو دیوار سے لگانے میں کوئی کسر نہیں چھوڑی، رمضان کے مہینے میں کھانے پینے کی اشیاء کی ریکارڈ قیمتوں نے عوام کی کمر توڑ دی ہے۔

چیئرمین بلاول بھٹو زرداری نے عمران خان کو مخاطب کرتے ہوئے واضح طور پر کہا کہ یہ ملک اور اس کے مسائل کا حل آپ کے بس کی بات نہیں، عمران خان نے جس رمضان پیکیج کا اعلان کیا تھا وہ کہیں نظر نہیں آرہا، چیئرمین بلاول بھٹو زرداری کا کہنا تھا کہ رمضان میں یوٹیلیٹی اسٹورز کو سبسڈی دینے سے حکومت کی ذمہ داری ختم نہیں ہوگئی کیونکہ اوپن مارکیٹ میں مہنگائی آسمان کو چھورہی ہے جبکہ انتظامیہ کی جانب سے لگائے گئے بیشتر بچت بازاروں میں اوپن مارکیٹ سے زیادہ مہنگی اشیا فروخت ہورہی ہیں۔

چیئرمین بلاول بھٹو زرداری کا یہ بھی کہنا تھا کہ آج رمضان میں عام آدمی کا اتنا بجٹ بھی نہیں کہ وہ اپنے اہل خانہ کے لئے یومیہ سبزیاں اور پھل تک خرید سکے، چیئرمین بلاول بھٹو زرداری نے کہا کہ عمران خان نے ملک کو قرضوں میں جھونک کر مافیاز کے حوالے کردیا ہے، ان کا یہ بھی کہنا تھا کہ وزرائے خزانہ کی تبدیلی سے عوام کی تکلیفوں میں کوئی کمی نہیں آسکتی، اصل ریلیف عوام کو اس وقت ملے گا جب ملک میں مہنگائی کے ذمہ دار نااہل حکمران گھر جائیں گے۔

مزید پڑھیں:شوگر اسکینڈل کی تحقیقات،میاں اسلم اقبال اور سمیع اللہ چوہدری 4 مئی کو نیب طلب

چیئرمین بلاول بھٹو زرداری نے سوال کیا کہ نااہل وزیراعظم دنیا کی مثالیں دینے کے بجائے یہ بتائیں کہ ان کی حکومت نے عوام کیلے اب تک کیا کیا ؟ انہوں نے ملکی صورت حال کی جانب اشارہ کرتے ہوئے کہا کہ ہر مہینے مہنگائی میں اضافے کی شرح خود اپنا ریکارڈ توڑ رہی ہے اور مہنگائی کے حوالے سے حکومت کے اپنے ہی اعداد و شمار اس کے کارناموں کی قلعی کھول رہے ہیں۔

اس موقع پر چیئرمین بلاول بھٹو زرداری کا یہ بھی کہنا تھا کہ حالیہ تھنک ٹینکس کی رپورٹ بتاتی ہے کہ معیشت سخت سست روی کا شکار ہے، دنیا کے آگے کشکول لے کر گھومنے والے وزیراعظم نے عوام کو کوئی ریلیف نہیں بلکہ صرف رسوائی دی، چیئرمین بلاول بھٹو زرداری نے عمران خان کی مہنگائی کو قابو کرنے میں ناکامی پر کہا کہ وہ ضد چھوڑیں اور عوام پر رحم کھاکر مستعفی ہوں اور گھر جائیں۔