رواں مالی سال کے پہلے 8ماہ کے دوران بڑی صنعتوں کی پیداوار میں 7.45فیصد اضافہ

کراچی:رواں مالی سال کے پہلے 8 ماہ کے دوران بڑی صنعتوں کی پیداوار میں 7.45 فیصد کا اضافہ ہواہے، فروری میں سالانہ بنیادوں پر بڑی صنعتوں کی پیداوار میں 4.85 فیصدبہتری دیکھی گئی۔

ماہانہ بنیادوں پر بڑی صنعتوں کی پیداوار میں 4.15 فیصد کمی ہوئی، جولائی تا فروری سالانہ بنیادوں پر ٹیکسٹائل شعبے کی پیداوار میں 2.69 فیصد اضافہ ریکارڈ کیا گیا۔

وفاقی ادارہ شماریات کی رپورٹ میں کہا گیا ہے کہ رواں مالی سال کے پہلے آٹھ ماہ کے دوران15 بڑی صنعتوں میں سے 8 صنعتوں کی پیداوار میں اضافہ اور7 صنعتوں کی پیداوار میں کمی ہوئی۔

جولائی سے فروری کے دوران فوڈ،مشروبات اور تمباکو شعبے کی پیداوار میں 15.75 فیصد اضافہ ہوا،کوک اور پیٹرولیم مصنوعات کی پیداوار 7.94 فیصد اور فارماسوٹیکل سیکٹر کی پیداوار میں 12.09 فیصد اضافہ ہوا۔اسی طرح کیمیکلز شعبے کی پیداوار میں 10.83 فیصد اور فرٹیلائزر سیکٹر کی پیداوار جب میں 5.66 فیصد اضافہ ہوا۔

جولائی تا فروری کے دوران آٹو موبیل سیکٹر کی پیداوار میں 14.66 فیصد جبکہ فروری میں سالانہ بنیادوں پر آٹو موبیل سیکٹر کی پیداوار میں 26 فیصد اضافہ ریکارڈ کیا گیا۔

جولائی سے فروری میں سالانہ بنیادوں پر آئرن اور اسٹیل مصنوعات کی پیداوار میں 1.39 فیصد اور الیکٹرانکس کی پیداوار میں 24.36 فیصد کمی رکارڈ کی گئی اسی طرح چمڑے کی مصنوعات کی پیداوار 40.49 فیصد گرگئی۔