گوگل نیوز پر ہمیں فالو کریںاسلام آباد: ہمسایہ ملک چین سے کورونا ویکسین کی 10 لاکھ سے زائد مزید خوراکوں پر مشتمل کھیپ آئندہ ہفتے پاکستان پہنچیں گی۔
سماجی رابطے کی ویب سائٹ ٹوئٹر پر اپنے پیغام میں وزیرِ اعظم کے معاونِ خصوصی برائے امورِ صحت ڈاکٹر فیصل سلطان نے کہا کہ پاکستان نے چین سے کورونا ویکسین کی 10 لاکھ خوراکیں خریدنے کا معاہدہ کیا ہے اور کینسو ویکسین کی 6 لاکھ 60 ہزار خوراکوں کی خریداری کیلئے بھی آرڈر دے دیا ہے۔
معاونِ خصوصی کے بیان کے مطابق کینسو ویکسین کی 6 لاکھ 60 ہزار خوراکیں چند دن میں وصول کر لی جائیں گی جبکہ کورونا ویکسین کی لاکھوں اضافی خوراکیں بھی اپریل تک موصول ہوجائیں گی۔ قبل ازیں پاکستان کو سائنو فارم ویکسین کے 3 شپ منٹس وصول ہوچکی ہیں۔
دوسری جانب ورلڈ ہیلتھ آرگنائزیشن کی زیرِ قیادت کوویکس نامی کورونا ویکسین کی 1 کروڑ 70 لاکھ خوراکوں کی ترقی پذیر ممالک کو فراہمی تعطل کا شکار ہے جس میں مزید رکاوٹیں پیدا کی جارہی ہیں۔ خوراکیں شیڈول کے تحت مارچ کے آخر تک وصول ہوجانی چاہئیں تھیں تاہم ایسا نہ ہوسکا۔
عالمی ادارۂ صحت کو کورونا ویکسین کی خوراکیں تیار کرکے دینے والے بھارتی سیرم انسٹیٹیوٹ نے خود بھارتی ضروریات کو پورا کرنے کیلئے خوراکوں کی رسد کا رخ موڑ دیا ہے جبکہ کورونا وائرس سے متاثرہ ممالک کی فہرست میں امریکا اور برازیل کے بعد بھارت تیسرا بڑا ملک ہے۔
یہ بھی پڑھیں: امیر ممالک غریب ملکوں کو ایک کروڑ ویکسینز کا عطیہ دیں۔ ادارۂ صحت
