گوگل نیوز پر ہمیں فالو کریںاسلام آباد: وزیرِ اعظم عمران خان نے سینیٹ انتخابات میں یوسف رضا گیلانی کی جیت پر ردِ عمل دیتے ہوئے کہا ہے کہ وزیرِ اعظم کا عہدہ میرے لیے اہمیت نہیں رکھتا جبکہ نظام کی تبدیلی میرا مشن ہے۔
تفصیلات کے مطابق وفاقی دارالحکومت اسلام آباد میں وزیرِ اعظم کی زیرِ صدارت اجلاس کی اندرونی کہانی سامنے آگئی۔ باوثوق ذرائع کا کہنا ہے کہ وزیرِ اعظم عمران خان نے میٹنگ کی ابتداء میں شرکائے اجلاس کو اعتماد کا ووٹ لینے کے فیصلے سے آگاہ کردیا۔
اجلاس کے دوران گفتگو کرتے ہوئے وزیرِ اعظم عمران خان نے کہا کہ اعتماد کا ووٹ لینے کا مقصد پیسے کی سیاست کو بے نقاب کرنا ہے۔ میں نے فیصلہ کیا ہے کہ اسی ایوان سے اعتماد کا ووٹ حاصل کروں گا۔ چوہوں کی طرح حکومت نہیں کرسکتا۔
گفتگو کے دوران وزیرِ اعظم عمران خان نے کہا کہ جس رکنِ اسمبلی کو مجھ پر اعتماد نہیں، سامنے آئے اور کھل کر اظہار کرے۔ مجھے اقتدار عزیز ہوتا تو خاموش ہو کر بیٹھ جاتا۔ وزیرِ اعظم کا عہدہ اہم نہیں، نظام کی تبدیلی مقصد ہے۔ آج میرے مؤقف کو مکمل طور پر تقویت حاصل ہوئی۔
وزیرِ اعظم عمران خان نے کہا کہ ہم ووٹ بیچنے اور خریدنے والوں کو بے نقاب کردیں گے۔ شفاف الیکشن کرانا الیکشن کمیشن کی ذمہ داری ہے۔ یہ جنگ ابھی ختم نہیں ہوئی، شفافیت کیلئے ہر فورم پر جائیں گے۔
یہ بھی پڑھیں: وزیر اعظم عمران خان کا ایوان سے اعتماد کا ووٹ لینے کا فیصلہ
