وزیر داخلہ کا اسلام آباد ائیرپورٹ کا دورہ، مسافروں کو دی جانے والی سہولیات کا جائزہ

اسلام آباد: وفاقی وزیر داخلہ شیخ رشید نے اسلام آباد ایئر پورٹ کا دورہ کیا، شیخ رشید احمد نے مسافروں کو دی جانے والی سہولیات کا جائزہ لیا۔

اس موقع پر شیخ رشید کا کہنا تھا کہ اورسیز پاکستانی ہمارا اثاثہ ہیں، بیرون ملک سے آنے والوں کو دی جانے والی سہولیات میں کوتاہی برداشت نہیں کی جائے گی۔ شیخ رشید کے ہمراہ سیکرٹری داخلہ، ڈی جی ایمیگریشن، اور ایف آئی اے بھی موجود تھے

انہوں نے کہا کہ مسافروں کا بہترین طریقے سے خیال رکھنے کے لیے ایف آئی اے ایمیگریشن، اے ایس ایف اور محکمہ کسٹمز کو خصوصی ہدایات جاری کی گئی ہیں۔

وفاقی وزیر داخلہ نے کہا کہ ایک سو بانوے ملکوں کے لئے آن لائن ویزہ جاری کیا گیا ہے،کوئی آدمی اسٹیکر کا پوچھے تو مجھ سے ڈائیریکٹ رابطہ کرے، وزیر اعظم کا فیصلہ ہے کہ آن لائن ویزہ کے لئے کوئی رکاوٹ نہ ہو۔
انہوں نے کہا کہ ای پاسپورٹ دو مہینے تک لوگوں کو ملے گا،اس سے پاکستان کا امیج بہتر ہوگا،مزدوروں کے لیے پاسپورٹ کی مدت دس سال کر دی گئی ہے۔

شیخ رشیدنے کہا کہ نادرا روزانہ ایک لاکھ پاسپورٹ بنائے گا اور پہلا مفت ہو گا، تمام اوور سیز پاکستانیوں کو یقین دلاتا ہوں کہ ائیرپورٹ پر آپ کو بہترین سہولیات ملیں گی۔