راولپنڈی،تھانہ گنج منڈی کے نزدیک دستی بم دھماکا، 25 افراد زخمی

راولپنڈی: تھانہ گنج منڈی کے سامنے فلٹریشن پلانٹ کے دستی بم کا دھماکہ، دھماکے کے نتیجے میں 25افراد کے زخمی ہونے کی اطلاعات موصول ہورہی ہیں، جبکہ زخمیوں کو اسپتال منتقل کردیا گیا ہے۔

راولپنڈی کے علاقے تھانہ گنج منڈی کے قریب نامعلوم افراد دستی بم پھینک کر فرار ہوگئے، جس کے اطلاع ملتے ہی پولیس کی بھاری نفری، بم ڈسپوزل اسکوارڈ کا عملہ اور ریسکیو کی ٹیمیں موقع پر پہنچ گئیں اور کسی کو مذکورہ جگہ پر آنے کی اجازت نہیں دی جارہی۔

ترجمان ریسکیو 1122 کا اس حوالے سے کہنا ہے کہ دستی بم کچھ دیر بعد پھٹ گیا اور دھماکے میں 25 افراد زخمی ہوگئے، جن میں سے 3 افراد کو موقع پر ہی طبی امداد دے کر بھیج دیا گیا جب کہ باقی 22 افراد کو ڈی ایچ کیو اسپتال منتقل کردیا گیا۔

ایس ایچ او تھانہ گنج منڈی نے اس حوالے سے بتایا کہ دھماکا تھانے کے سامنے فلٹریشن پلانٹ کے نزدیک ہوا، دھماکے کے بعد جائے حادثہ کے قریب تمام علاقے کو گھیرے میں لے کر سرچ آپریشن کا آغاز کردیا گیا ہے۔ جب کہ پولیس اور بم ڈسپوزل اسکوارڈ کا عملہ دھماکے کی نوعیت جاننے کی کوشش کررہے ہیں۔

سی پی او راولپنڈی احسن یونس نے میڈیا سے گفتگو کرتے ہوئے کہا کہ شہر میں 10 روز کے دوران یہ دوسرا دھماکا ہے، پہلا دھماکا پیرودہائی اور دوسری آج گنج منڈی میں ہوا۔

ان کا کہنا تھا کہ دونوں دھماکے تھانوں کے قریب ہوئے، جب کہ خفیہ اداروں کی جانب سے شہر میں دہشت گردی کی اطلاعات بھی موجود ہیں، تاہم پیرودہائی بم دھماکے کی تحقیقات میں اہم پیش رفت ہوئی ہے، گنج منڈی میں دھماکے کی نوعیت کا فی الوقت نہیں بتاسکتے۔اس حوالے سے تحقیقات کررہے ہیں۔