عماد وسیم کا میلبورن رینگیڈ کے ساتھ باقاعدہ معاہدہ طے پاگیا

میلبور ن:پاکستان کرکٹ ٹیم کے آل راؤنڈر عماد وسیم رواں سیزن میں آسٹریلیا کی ٹی20 لیگ بگ بیش میں میلبورن رینگیڈ کیلئے کھیلیں گے۔نیوزی لینڈ کے دورے پر موجود بائیں ہاتھ کے اسپنر عماد وسیم میلبورن کے لیے کھیلے جانے والے پہلے تین میچوں میں دستیاب نہیں ہوں گے۔

امکان ہے کہ عماد وسیم کینبرا میں میلبورن رینگیڈ کے چوتھے میچ میں سڈنی تھنڈر کے خلاف دستیاب ہوں گے۔خیال رہے کہ پاکستان کرکٹ بورڈ (پی سی بی)نے عماد وسیم کو بگ بیش کے لیے این او سی جاری کردیا ہے۔

دوسری جانب میلبورن رینگیڈ نے بھی عماد وسیم کے ساتھ باقاعدہ معاہدے کی تصدیق کر دی ہے۔پاکستان کیلئے 55 ون ڈے اور 47 ٹی 20 کھیلنے والے عماد وسیم کی قیادت میں کراچی کنگز رواں برس پاکستان سپر لیگ 2020 کا اعزاز حاصل کرچکی ہے۔

پاکستانی کرکٹر عماد وسیم اس سال انگلینڈ میں ٹی 20 بلاسٹ کی چمپئن ٹیم ناٹنگھم شائر کیلئے بھی کھیل چکے ہیں۔عماد وسیم رواں ماہ 18 دسمبر کو اپنی 32 ویں سالگرہ کا کیک بھی کاٹیں گے۔