مقبوضہ کشمیر میں بھارتی فوج کی جارحیت کوبے نقاب کرتے رہیں گے: وزیراعظم

اسلام آباد: وزیراعظم عمران خان نے کہا ہے کہ پاکستان کشمیر پر غیر قانونی طور پر قابض بھارتی افواج کے ہاتھوں انسانی حقوق کی خلاف ورزیاں بلا خوف بے نقاب کرتا رہیگا۔

وزیراعظم عمران خان کا سوشل میڈیا پر اپنے ٹوئٹ میں کہنا تھا کہ اقوام متحدہ کی انسانی حقوق کونسل کے لیے پاکستان کے مزید 3 برس کے لیے انتخاب پر نہایت شاد ہوں۔

I am pleased with Pakistan’s re-election to UN Human Rights Council for another 3-yr term. We remain committed to upholding human rights for all, prioritizing advancement of tolerance & constructive engagement. We stand resolute against Islamophobia & in support of mutual respect

— Imran Khan (@ImranKhanPTI) October 14, 2020

وزیر اعظم عمران خان نے اپنے ٹوئٹ میں لکھا کہ اس بڑی سفارتی کامیابی پر میں دفتر خارجہ اور بیرونِ ملک موجود پاکستان کے سفارتی مشنز کے کردار کو سراہتا ہوں جن کی کاوشوں سے عالمی افق پر پاکستان کی حیثیت اور ساکھ میں اضافہ ہوا۔

وزیر اعظم نے مزید لکھا کہ برداشت کے فروغ اور تعمیری سرگرمیوں کو اپنی ترجیحات کا حصہ بناتے ہوئے ہم سب کے لیے انسانی حقوق کے تحفظ کا عزم کیے ہوئے ہیں۔

ان کا کہنا تھا کہ اسلاموفوبیا کے خلاف احترامِ باہمی کی حمایت میں بھی ہمارا مؤقف غیر متزلزل ہے۔انہوں نے کہا کہ پاکستان اتفاقِ رائے کے حوالے سے اپنی کاوشیں جاری رکھے گا اور یقینی بنائے گا کہ کونسل کے کام کی بنیاد عالمگیریت، غیرجانبداریت، گفت و شنید اور تعاون کے اصولوں پر استوار ہو۔

انہوں نے کہا کہ پاکستان کشمیر پر غیر قانونی طور پر قابض بھارتی افواج کے ہاتھوں انسانی حقوق کی بلاخوفِ احتساب خلاف ورزیاں بھی بینقاب کرتا رہے گا۔

واضح رہے کہ پاکستان آئندہ تین برسوں کے لیے اقوام متحدہ کی انسانی حقوق کونسل کا رکن منتخب ہو گیا ہے۔ پاکستان نے اقوام متحدہ کے 193 ممالک میں سے 169 ووٹ حاصل کیے۔