گوگل نیوز پر ہمیں فالو کریںاسلام آباد: دفتر خارجہ کی ترجمان عائشہ فاروقی نے کل بھوشن یادیوکیس میں بھارت کے وکیل ہریش سالوے کے بے بنیاد الزامات کو مسترد کردیا ہے۔
ترجمان دفتر خارجہ عائشہ فاروقی نے بھارتی وکیل کے الزامات کی تردید کرتے ہوئے کہا ہے کہ پاکستان نے بین الاقوامی عدالت کے فیصلے کی مکمل تعمیل کی ہے۔
بین الاقوامی عدالت انصاف میں کل بھوشن کے کیس میں ہندوستان کی نمائندگی کرنیوالے ہریش سالوے نے ایک آن لائن لیکچر میں الزام لگایا تھا کہ پاکستان نے عالمی ادارہ انصاف کے فیصلے پر عملدرآمد نہیں کیا۔
انہوں نے یہ الزام بھی لگایا تھا کہ پاکستان نے کل بھوشن تک قونصلر رسائی کی منظوری تاخیر سے دی اور اس معاملے کی تفصیلات کو بھارت کے ساتھ شیئرسے انکار کردیا تھا۔
ترجمان دفتر خارجہ عائشہ فاروقی نے کہا ہے کہ ہریش سالوے کے بیانات افسوسناک اور حقائق کے منافی ہیں۔ انہوں نے کہا کہ پاکستان اپنی تمام تر بین الاقوامی ذمہ داریوں سے آگاہ اور ان پر عمل پیرا ہے۔
واضح رہے کہ جولائی 2019 میں بین الاقوامی عدالت انصاف نے کل بھوشن کو قونصلر تک رسائی دینے کی اجازت دینے کے حق میں فیصلہ سنایا تھا۔
3 مارچ 2016 کو بھارتی ایجنسی راء سے وابستہ بھارتی بحریہ کے ونگ کمانڈر کل بھوشن یادیوکو جاسوسی اور دہشت گردی کے الزام میں بلوچستان سے گرفتار کیا گیا تھا۔
مزید پڑھیں: کلبھوشن کیس: آرمی ایکٹ میں ترمیم کی خبریں غلط ہیں، ڈی جی آئی ایس پی آر
