پرویز الٰہی نے حکومت سے وکلاء کیلئے فنڈز جاری کرنے کا مطالبہ کردیا

لاہور: اسپیکر پنجاب اسمبلی چوہدری پرویز الٰہی نے حکومت سے وکلاء کیلئے فنڈز جاری کرنے کا مطالبہ کردیا۔اسپیکر پنجاب اسمبلی چوہدری پرویز الٰہی نے کہا ہے کہ پنجاب حکومت وکلاء کی مشکلات اور ان کو درپیش مسائل کے حل کیلئے فوری طور پر بجٹ میں مختص فنڈز جاری کرے۔

چوہدری پرویز الٰہی نے کہا کہ فنڈز جاری کرنے میں تاخیر کرنے سے وکلاء کو کوئی فائدہ نہیں ہوگا۔انہوں نے کہا کہ پوری دنیا اس وقت وبائی مرض کا شکار ہے اور پاکستان میں ہر طبقہ معاشی مشکلات میں پس کر رہ گیا ہے۔

پنجاب حکومت احساس پروگرام کے تحت سفید پوش افراد کی مدد کر رہی ہے لیکن وکلاء جو ملک میں ریڑھ کی ہڈی کی حیثیت رکھتے ہیں وہ ابھی تک حکومتی امداد سے محروم ہیں۔لہٰذا ان کے لئے فوری فنڈز جاری کئے جائیں۔

چوہدری پرویز الٰہی نے مزید کہا کہ وکلاء کے فنڈز منظور کرنے کیلئے جو سمری تیار کی گئی ہے اسے فوری طور پر منظور کیا جائے،کیونکہ وکلاء نہ توکوئی کاروبار کر سکتے ہیں اور نہ ہی نوکری۔ اس مشکل وقت میں حکومت کا فرض ہے وہ وکلاء برادری کی ہر ممکن مدد کرے۔