گورنر پنجاب کی کورونا وائرس سے لڑنے والے ڈاکٹرزو پیرا میڈیکس کی تعریف

راولپنڈی : گورنر پنجاب چوہدری محمد سرور نے ملک میں کورونا وائرس کے خلاف جنگ میں فرنٹ لائن پر لڑنے والے ڈاکٹرز اور پیر میڈیکس کی تعریف کی ہے۔

اتوار کے روز راولپنڈی میں میڈیا سے خطاب کرتے ہوئے گورنر پنجاب چوہدری محمد سرور نے اسپتالوں میں کام کرنے والے ڈاکٹروں اور پیرا میڈیکل عملے کو کورونا سے متاثرہ مریضوں کی دیکھ بھال کرنے پر زبردست خراج تحسین پیش کیا اور کہا کہ قوم ان کی خدمات کو ہرگز فراموش نہیں کرے گی۔

انہوں نے کہا کہ کورونا کے خلاف جنگ میں طبی عملے کا تحفظ حکومت کی اولین ترجیح ہے اور انہیں ذاتی تحفظ کاسامان مہیا کیا جارہا ہے۔

مزید پڑھیں: وزیرِ اعلیٰ کا لاک ڈاؤن کے جائزے کیلئے لاہور کے مختلف علاقوں کا اچانک دورہ

انہوں نے کورونا کے خلاف فرنٹ لائن پر اپنا کردار ادا کرنے پرریسکیو 1122 کے کردار کو بھی سراہا ۔

چوہدری سرور نے مخیر حضرات کی بھی تعریف کی جنہوں نے ہمیشہ ملک کی ہر نازک صورتحال میں اپنا کردار ادا کیا۔

انہوں نے کہا کہ مخیر حضرات کی شراکت کی وجہ سے اس وبائی بیماری پر قابو پانے کے لئے استعمال ہونے والی حفاظتی کٹس ، ماسک اور دیگر طبی سامان کی کمی نہیں ہے۔