اسلام آباد:پاکستان کے وزیر خارجہ شاہ محمود قریشی نے کہا ہے کہ ڈینیل پرل کیس کے فیصلے پرامریکا کا ردعمل فطری ہے،محکمہ داخلہ نے ملزمان کو90 روزکے لیے حفاظتی طویل میں لے لیا ہے، حکومت سندھ کی جانب سے فیصلے کے خلاف اپیل بھی دائرکی جائیگی۔
شاہ محمود قریشی نے ڈینیل پرل کیس کے حوالے سے اہم بیان میں کہاکہ امریکہ کی طرف سے ڈینیل پرل کیس کے حوالے سے سامنے آنے والے تحفظات فطری ہیں۔
ڈینیل پرل اچھے صحافی تھے انہیں پہلے تاوان کیلئے اغوا کیا گیا اور پھر قتل کر دیا گیا یہ خبر پوری دنیا میں پھیلی اور پاکستان پر انگلیاں بھی اٹھائی گئیں ہمیں حدف تنقید بنایا گیا۔
پاکستان نے دہشت گردی کے خلاف جنگ میں بہت قربانیاں دیں پوری قوم نے مل کر دہشت گردی کے خلاف ایک طویل لڑائی لڑی اور اسے شکست دی۔
ڈینیل پرل کیس میں ملزمان گرفتار ہوئے مقدمہ چلا اور بالآخر تین ملزمان کو قید کی سزا ہوئی اور مرکزی ملزم شیخ عمر کو سزائے موت سنائی گئی۔ انہوں نے کہاکہ اپیل کا حق انہیں حاصل تھا۔
چنانچہ ان کی اپیل کو سندھ ہائی کورٹ نے تسلیم کر کے، انسداد دہشت گردی کورٹ، حیدرآباد کی طرف سے دی گئی سزا کو معطل کرتے ہوئے، تین ملزمان کو بری جبکہ شیخ عمر کی سزائے موت کو سات سال قید میں تبدیل کرنے کے احکامات جاری کیے،اس فیصلے سے تشویش پیدا ہوئی۔
سندھ ہوم ڈیپارٹمنٹ نے پبلک سیفی ایکٹ کے تحت 90 روز کیلئے ملزمان کی نظر بندی کا فیصلہ کیا اور سندھ ہائی کورٹ کے فیصلے کے خلاف اپیل میں جانے کا بھی فیصلہ کیا گیا، اپیل کا فورم موجود ہے اب یہ متعلقہ عدالت نے دیکھنا ہے کہ وہ سندھ ہائی کورٹ کے فیصلے کو برقرار رکھتے ہیں یا کالعدم قرار دیتے ہیں۔
گوگل نیوز پر ہمیں فالو کریں
