غیر قانونی تقرری کیس میں شاہد خاقان کی 4 ہفتوں کیلئے ضمانت منظور

اسلام آباد: اسلام آباد ہائیکورٹ نے غیر قانونی تقرری کیس میں سابق وزیر اعظم شاہد خاقان عباسی کی چار ہفتوں کی ضمانت منظور کرلی ہے۔

شاہد خاقان عباسی نے اسلام آباد ہائیکورٹ سے کیس میں حفاظتی ضمانت کی درخواست کی تھی، سابق وزیراعظم ان کی طرف سے بیرسٹر ظفر اللہ خان نے درخواست دائر کی تھی۔

کراچی کی مقامی عدالت نے غیرقانونی تقرری کیس میں 27 مارچ کو ان کی گرفتاری کے وارنٹ جاری کئے تھے جبکہ نیب نے سابق وزیراعظم کے خلاف دوسرا ریفرنس دائر کردیا ہے۔

مزید پڑھیں : شوگرملز کیس میں نواز شریف اور مریم نواز کو حاضری سے استثنیٰ مل گیا

غیر قانونی تقرری سے متعلق ایک ریفرنس میں احتساب عدالت نے شاہد خاقان عباسی کے ناقابل ضمانت وارنٹ جاری کئے تھے جبکہ گذشتہ ماہ انھیں ایل این جی کیس میں ضمانت ملی تھی۔

شاہد خاقان عباسی کا کہنا ہے کہ قومی احتساب بیورو نے ملک کو مفلوج کردیا ہے ۔ نیب چھ ماہ ہونے کے باوجود ان کے خلاف کوئی الزام ثابت نہیں کرسکا۔

شاہد خاقان عباسی نے یہ بھی دعویٰ کیا ہے کہ نیب میرے دوستوں اور خاندان کے افرادپر دباؤ ڈال رہا ہے۔

انہوں نے سیاسی قائدین کے خلاف نیب کی کارروائی کے لئے موجودہ حکومت کو ذمہ دار ٹھہرایا اور کہا کہ ریاست نیب کو سیاسی استعمال میں لا رہی ہے ۔