پاکستان میں کورونا وائرس کے مشتبہ مریضوں کی تعداد 5 ہوگئی، ایک پاکستانی بھی شامل

لاہور: پاکستان میں کورونا وائرس کے مشتبہ مریضوں کی تعداد 5 ہوگئی،3 سروسز اسپتال لاہور جبکہ 2 نشتر اسپتال ملتان میں زیر علاج ہیں۔

ذرائع کے مطابق ملتان کے نشتر اسپتال میں داخل دو مریضوں میں سے ایک مریض پاکستانی شہری ہے ، لاہور کے سروسزاسپتال میں داخل تینوں مریضوں کا تعلق چینی شہر ووہان سے ہے۔

تمام مریضوں کے سیمپل ہانگ کانگ لیبارٹری کو بھجوا دئیے گئے ہیںجبکہ 24 سے 48 گھنٹوں میں رپورٹس آنے کے بعد ہی علاج شروع کیا جاسکے گا، کورونا کے تمام مشکوک مریضوں کو آئیسولیشن اور انتہائی نگہداشت وارڈز میں رکھا گیا ہے۔

مزید پڑھیں: بل گیٹس نے ایک سال قبل چین میں کورونا وائرس کی پیش گوئی کردی تھی

لاہور کے سروسزاسپتال کی انتظامیہ نے کورونا وائرس کے مشتبہ مریضوں کا علاج کرنے والے ڈاکٹرز کو مکمل حفاظتی لباس پہنا دئیے ہیں۔ حفاظتی لباس میں ماسک، گلوز اور گاگلز بھی شامل ہیں۔

سروسز اسپتال لاہور کی ایمرجنسی میں کورونا وائرس کاایک کاؤنٹر بھی قائم کر دیا گیا ہے جبکہ ایم ایس ڈاکٹر سلیم چیمہ کا کہنا تھا کہ حفاظتی لباس مہیا کرنے کا مقصد ڈاکٹرز اور دیگر عملے کو اس مہلک وائرس سے بچانا ہے۔