گوگل نیوز پر ہمیں فالو کریںملک کے مختلف حصوں میں ہونے والی بارش نے گرمی سے ستائے ہوئے لوگوں کو راحت دی ہے،پنجاب، خیبر پختونخوا، اسلام آباد اور بلوچستان کے کئی شہروں میں موسم خوشگوار ہو گیا۔
لاہور، سرگودھا، بھلوال اور دیگر علاقوں میں کہیں ہلکی پھوار پڑی اور کہیں تیز بارش ہوئی جس سے گرمی میں کمی آئی۔ بارش کے بعد کچھ علاقوں میں بجلی چلی گئی جبکہ وزیراعلیٰ پنجاب مریم نواز کی ہدایت پر واسا کا عملہ پانی نکالنے کے کام میں مصروف ہے۔
اسلام آباد میں تیز بارش کی وجہ سے موٹر وے پر ٹریفک متاثر ہوئی۔ اسلام آباد ٹول پلازہ سے رشاکئی انٹرچینج تک گاڑیوں کو عارضی طور پر روکا گیا ہے تاکہ پھسلن کی وجہ سے حادثے نہ ہوں۔
خیبر پختونخوا کے شہر کرک اور آس پاس کے علاقوں میں بھی بارش ہوئی جس سے موسم خوشگوار ہو گیا۔ گلگت بلتستان کے بلتستان ڈویژن میں بھی آج سے بارش کی پیش گوئی کی گئی ہے۔
محکمہ موسمیات نے بتایا ہے کہ بلوچستان کے مشرقی اور وسطی علاقوں، خاص طور پر کوہِ سلیمان کے پہاڑی علاقوں میں پری مون سون بارشیں شروع ہو گئی ہیں، جو 29 جون تک وقفے وقفے سے جاری رہیں گی۔
شہریوں کو مشورہ دیا گیا ہے کہ سفر کے دوران احتیاط کریں، بجلی کی تاروں سے دور رہیں اور مقامی حکام کی ہدایات پر عمل کریں تاکہ کسی نقصان سے بچا جا سکے۔
