گوگل نیوز پر ہمیں فالو کریںاداکارہ علیزے شاہ نے عید الاضحی سے قبل ایک جذباتی پیغام جاری کیا ہے جو سوشل میڈیا پر بھرپور توجہ حاصل کر رہا ہے۔
عیدالاضحی جیسے اہم اسلامی تہوار کے قریب آتے ہی علیزے شاہ نے انسٹاگرام پر قربانی کے طریقہ کار اور اس کی عوامی نمائش سے متعلق اپنی تشویش کا اظہار کیا۔
انہوں نے واضح کیا کہ ان کی یہ پوسٹ کسی تنقید کے لیے نہیں بلکہ “دل سے نکلا ایک نرم سا خیال” ہے۔ علیزے نے لکھا، “براہ کرم سمجھیں کہ یہ تنقید نہیں، بلکہ ایک مختلف زاویہ نظر کی خاموش آواز ہے۔
میں جانتی ہوں کہ قربانی سنت ہے، حضرت ابراہیمؑ کی عظیم قربانی کی یادگار ہے لیکن یہ بھی سچ ہے کہ یہ ہر مسلمان پر فرض نہیں ہے۔ مگر بعض اوقات محسوس ہوتا ہے کہ یہ مقدس عمل اپنی اصل روح سے دور ہوتا جا رہا ہے۔”
انہوں نے خاص طور پر عوامی مقامات پر قربانی کے مناظر، خون آلود سڑکیں، خوفزدہ جانور اور ان کی دلخراش چیخوں کو اپنی بے چینی کا باعث قرار دیا۔
ان کا کہنا تھا کہ ایسے مناظر اور ان کی ویڈیوز، تصاویر یا میمز کی سوشل میڈیا پر نمائش نہایت حساس دلوں کے لیے تکلیف دہ ہوتی ہے۔
علیزے شاہ نے کہاکہ وہ جانور بھی اسی محبت کرنے والے خدا کی مخلوق ہیں جس نے ہمیں پیدا کیا۔ انہیں اس طرح عوامی اذیت میں مبتلا دیکھنا میرے لیے بہت مشکل ہوتا ہے۔
انہوں نے ان افراد کا احترام کیا جو خلوص اور عقیدت کے ساتھ قربانی کرتے ہیں، مگر یہ بھی کہا کہ ہمیں اس عمل کو دکھاوے کے بجائے قربانی کی اصل روح ایثار، رحم دلی، اور عاجزی کے ساتھ منانے کی ضرورت ہے۔
انہوں نے نرمی سے درخواست کی، “براہ کرم سوچ سمجھ کر سوشل میڈیا پر تصاویر اور ویڈیوز شیئر کریں۔ ہم میں سے کچھ لوگ ان سے گہرا اثر لیتے ہیں۔ اسلام ہمیں انسانوں اور جانوروں دونوں کے لیے رحم، ہمدردی اور وقار سکھاتا ہے۔”
