گوگل نیوز پر ہمیں فالو کریںپاکستانی فلم انڈسٹری کی اداکارہ عائشہ عمر نے کہا ہے کہ مجھے کام کے آغاز ہی سے متعدد بار جنسی طور پر ہراساں کیا گیا جبکہ میں جنسی ہراسانی کے واقعات بتانے کی طاقت نہیں رکھتی۔
کراچی میں میڈیا نمائندگان کو انٹرویو دیتےہوئے اداکارہ عائشہ عمر نے کہا کہ پاکستانی فلم انڈسٹری میں پیش آنے والے جنسی ہراسانی کے واقعات کے سدِ باب کے لیے می ٹو مہم ضروری ہے۔
می ٹو مہم کی افادیت پر بات چیت کرتے ہوئے عائشہ عمر نے کہا کہ جنسی ہراسانی سے متاثر لوگ می ٹو مہم کی بدولت سامنے آئے۔ اگر کوئی شخص جنسی ہراسانی معاملات کو بے نقاب کرنے کے لیے ہمت کرے تو اس کی حوصلہ افزائی کرنی چاہئے۔
عائشہ عمر نے کہا کہ می ٹو مہم کے غلط استعمال کی مکمل طور پر تردید نہیں کی جاسکتی، ایسے بہت لوگ ہیں جو مہم کا غلط استعمال کر رہے ہیں لیکن اس سے مہم کا غلط ہونا ثابت نہیں ہوتا۔
انہوں نے کہا کہ جنسی ہراسانی کے ایسے کیا واقعات تھے جو مجھ پر گزرے، یہ بتانے کی طاقت نہیں رکھتی، لیکن جو لوگ یہ ہمت کرتے ہیں، ان کی حمایت کروں گی۔ مجھے اس حوالے سے گفتگو کے لیے وقت لگے گا۔
