گوگل نیوز پر ہمیں فالو کریںاسلام آباد: پاکستان اور متحدہ عرب امارات نے بینکاری، ریلوے، کان کنی اور بنیادی ڈھانچے میں سرمایہ کاری سمیت مختلف شعبوں میں دوطرفہ تعاون کو فروغ دینے کے لیے پانچ معاہدوں پر دستخط کیے۔
جمعرات کے روز یہ معاہدے ابوظہبی کے ولی عہد شیخ خالد بن محمد بن زاید النہیان کے پہلے سرکاری دورۂ پاکستان کے دوران وزیر اعظم شہباز شریف کی دعوت پر کیے گئے۔
دونوں رہنماؤں نے تقریب کے دوران معاہدوں اور مفاہمتی یادداشتوں پر دستخط کے پہلے سے تیار شدہ دستاویزات کے تبادلے کا مشاہدہ کیا۔ اس موقع پر وفاقی کابینہ کے ارکان، چیف آف آرمی اسٹاف جنرل سید عاصم منیر اور متحدہ عرب امارات کے وفد کے ارکان بھی موجود تھے۔
پاکستان اور یو اے ای نے بینکاری کے شعبے میں دوطرفہ تعاون کو فروغ دینے کے لیے ایک معاہدے پر دستخط کیے۔ اس موقع پر سیکریٹری فنانس امداد اللہ بوسال اور آئی ایچ سی کے سی ای او و ایم ڈی سید بصر شعیب نے دستاویزات کا تبادلہ کیا۔
اسی طرح، کان کنی کے شعبے میں تعاون بڑھانے کے لیے بھی ایک معاہدے پر دستخط کیے گئے۔
پاکستان ریلوے کے سی ای او عامر علی بلوچ اور اتحاد ریل کے سی ای او شادے ملک نے ریلوے کے شعبے میں دو مفاہمتی یادداشتوں کے معاہدوں کا تبادلہ کیا۔
علاوہ ازیں، سیکریٹری بورڈ آف انویسٹمنٹ ندیم چوہدری اور اے ڈی پورٹس کے سی ای او کیپٹن محمد جمعہ الشامسی نے بنیادی ڈھانچے میں سرمایہ کاری سے متعلق مفاہمتی یادداشت کے معاہدے پر دستخط کیے۔
ابوظہبی کے ولی عہد شیخ خالد بن محمد بن زاید النہیان جمعرات کے روز اپنے پہلے سرکاری دورے پر اسلام آباد پہنچے، جہاں نور خان ایئربیس پر صدر آصف علی زرداری اور وزیر اعظم شہباز شریف نے ان کا استقبال کیا۔ کابینہ کے ارکان اور اعلیٰ سفارتی و سرکاری حکام بھی اس موقع پر موجود تھے۔
ایئربیس پر پاکستانی اور یو اے ای کے پرچم لہرا رہے تھے، جبکہ بچوں نے دونوں ممالک کے جھنڈے لہرا کر مہمان کا استقبال کیا۔
ولی عہد نے وزیر اعظم شہباز شریف سے ملاقات کی، جس میں دوطرفہ دلچسپی کے امور پر تبادلہ خیال کیا گیا۔ یہ ان کا ولی عہد کی حیثیت سے پاکستان کا پہلا سرکاری دورہ تھا۔
وزیر اعظم نے ولی عہد کا پرتپاک خیر مقدم کرتے ہوئے دونوں ممالک کے تاریخی اور برادرانہ تعلقات کو مزید مستحکم کرنے کے عزم کا اعادہ کیا۔ ون آن ون ملاقات کے بعد وفود کی سطح پر مذاکرات بھی ہوئے۔
