گوگل نیوز پر ہمیں فالو کریںبالی ووڈ اداکار سلمان خان نے پہلی بار ایک پوڈکاسٹ “دم بریانی” میں شرکت کی، جہاں انہوں نے نوجوان میزبانوں سے زندگی، کیریئر اور ذاتی ترقی سے متعلق مختلف پہلوؤں پر گفتگو کی۔ بات چیت کے آغاز میں ہی انہوں نے میزبانوں کے کام کے طریقہ کار اور ترجیحات پر سوال اٹھاتے ہوئے کچھ خدشات کا اظہار کیا۔
ایک موقع پر، سلمان نے میزبانوں کی ہندی پر عبور نہ ہونے پر تنقید کرتے ہوئے کہا: “اگر آپ کو ہندی نہیں آتی، تو آپ کو شرم آنی چاہیے۔ آپ یہ پوڈکاسٹ اپنے لیے کر رہے ہیں، نہ کہ سامعین کو دکھانے کے لیے۔” جب ایک میزبان نے ذکر کیا کہ پوڈکاسٹ یوٹیوب پر اپلوڈ ہوگا تاکہ آمدنی حاصل کی جا سکے، تو سلمان نے جواب دیا: “کیا تم اس سے پیسے کماؤ گے؟ یہ کیریئر کی طرف نہیں، بلکہ اس سے پیچھے ہٹنے والا قدم ہے۔”
گفتگو میں بھائی چارے، وفاداری، اور تعلقات میں اعتماد جیسے اہم موضوعات پر بھی بات ہوئی۔ سلمان خان نے مسلسل سیکھنے، خود کو بہتر بنانے اور نظم و ضبط کی ضرورت پر زور دیا۔ انہوں نے ذہنی صحت پر بھی گفتگو کی، خود سے مثبت گفتگو کرنے اور اچھے لوگوں کے ساتھ رہنے کی اہمیت پر روشنی ڈالی۔
اداکار سلمان خان نے کام اور ذاتی زندگی میں توازن، ناکامی اور کامیابی سے نمٹنے اور زندگی کی مشکلات میں حوصلہ برقرار رکھنے کے بارے میں اپنے خیالات کا اظہار کیا۔ انہوں نے نوجوانوں کو مشورہ دیا کہ وہ اپنی دلچسپیوں کا تعاقب کریں، محنت کریں، اور خاندانی اقدار جیسے کہ بزرگوں کی عزت اور خاندان کے ساتھ وقت گزارنے کو اہمیت دیں۔ اس دوران سوشل میڈیا کے اثرات اور بیرونی مشوروں کو دانشمندی سے فلٹر کرنے کی ضرورت پر بھی گفتگو ہوئی۔
میزبانوں کو جھاڑ پلا دی؟
کچھ میڈیا رپورٹس میں دعویٰ کیا گیا کہ سلمان خان نے پوڈکاسٹ کے دوران میزبانوں کو ڈانٹا، لیکن یہ درست نہیں ہے۔ جس گفتگو کو بنیاد بناکر یہ شوشا چھوڑا گیا، ویڈیو کے آٹھویں منٹ کے بعد یہ گفتگو تقریباً دو منٹ تک جاری رہی، اور سامعین خود ویڈیو دیکھ کر فیصلہ کر سکتے ہیں کہ اس میں کسی قسم کی ڈانٹ ڈپٹ نہیں ہوئی۔
مکمل پوڈکاسٹ کے دوران سلمان خان نے اپنی زندگی کے ذاتی تجربات اور کہانیاں عوام کے سامنے رکھیں، جو ان کے خیالات کی بنیاد بنی۔ انہوں نے نوجوان نسل کو زندگی اور کیریئر میں عزم اور ایمانداری کے ساتھ آگے بڑھنے کیلئے رہنمائی بھی فراہم کی۔
