گوگل نیوز پر ہمیں فالو کریںشہر قائد میں ایک حیران کن واقعہ پیش آیا، جہاں ٹک ٹاکر اسد علی کی اہلیہ حنا مبینہ طور پر طلائی زیورات اور نقدی لے کر اپنے ہی گھر سے فرار ہوگئیں۔
تاہم، خاتون کا مؤقف ہے کہ وہ شوہر کے مسلسل تشدد کے باعث گھر چھوڑ کر گئی ہیں۔
تفصیلات کے مطابق، اسد علی نے کورنگی تھانے میں مقدمہ درج کروایاتھا، جس میں مؤقف اختیار کیا کہ جب وہ گھر پہنچے تو بیوی موجود نہیں تھی، اور الماری سے طلائی زیورات اور 35 ہزار روپے بھی غائب تھے۔ گمشدہ زیورات میں کان کی بالیاں، ایک انگوٹھی، اور ڈیڑھ تولہ سونے کا گلے کا ہار شامل ہے۔ اسد نے شبہ ظاہر کیا کہ ان کی بیوی کو ان کے پڑوسی ظفر نے اغوا کیا ہے۔
دوسری جانب، حنا کا ایک ویڈیو بیان بھی سامنے آیا ہے جس میں انہوں نے شوہر پر گھریلو تشدد کے سنگین الزامات عائد کیے ہیں۔ حنا کا کہنا ہے کہ شادی کے بعد سے ہی اسد علی ان پر تشدد کرتا رہا، جس کے نتیجے میں ان کے تین بچے قبل از پیدائش فوت ہو گئے۔ خاتون کا مؤقف ہے کہ وہ ظلم و زیادتی سے تنگ آ کر گھر چھوڑنے پر مجبور ہوئیں۔
یہ معاملہ پیچیدہ صورت اختیار کر گیا ہے، جہاں ایک طرف چوری اور اغوا کا مقدمہ درج کیا جا چکا ہے، جبکہ دوسری جانب گھریلو تشدد کے الزامات نے ایک نیا رخ دے دیا ہے۔ پولیس نے تفتیش کا آغاز کر دیا ہے اور معاملے کی تحقیقات جاری ہیں۔
